அக்கரைப்பற்று மாநகர சபைக்கு சர்வதேச அங்கீகாரம்

நிருபர் – எம் என் முஹம்மது

அக்கரைப்பற்று மாநகர சபை, ஜெர்மன் அரசின் பொருளாதார ஒத்துழைப்பு மற்றும் அபிவிருத்தி அமைச்சின் ஆதரவுடன் செயல்படுத்தப்படும் சர்வதேச நகர அபிவிருத்தித் திட்டத்திற்கு தெரிவாகி, சர்வதேச அங்கீகாரத்தைப் பெற்றுள்ளது.

நேற்று (17) நடைபெற்ற அக்கரைப்பற்று மாநகர சபை அமர்வில், மாநகர முதல்வர் A.L.M. அதாஉல்லா அவர்களால் முன்மொழியப்பட்ட தீர்மானம் சபையின் ஏகமனதான அங்கீகாரத்தைப் பெற்றது.

இதன்படி, Engagement Global நிறுவனத்தினால் 2025 முதல் 2027 வரை நடைமுறைப்படுத்தப்படும் “Connective Cities Deep Dive Workshop – Water Resilience” எனும் சர்வதேச திட்டத்தில் பங்கேற்க அக்கரைப்பற்று மாநகர சபை தெரிவு செய்யப்பட்டுள்ளது.

உலகின் பல்வேறு நாடுகளிலிருந்து சமர்ப்பிக்கப்பட்ட 84 முன்மொழிவுகளில் இருந்து தேர்வு செய்யப்பட்ட 8 நகராட்சிகளில் ஒன்றாக அக்கரைப்பற்று மாநகர சபை இடம்பெற்றுள்ளதுடன், இலங்கையிலிருந்து தெரிவான ஒரே மாநகர சபையாகவும் திகழ்கிறது.

தென்கிழக்குப் பல்கலைக்கழகத்தின் புவியியல் துறையுடன் இணைந்து தயாரிக்கப்பட்ட இந்த முன்மொழிவு, நகரின் நீர்வள முகாமைத்துவத்தை மேம்படுத்துவதையும் காலநிலை மாற்றத்தால் ஏற்படும் சவால்களை எதிர்கொள்ளும் திறனை வலுப்படுத்துவதையும் நோக்கமாகக் கொண்டுள்ளது.

திட்டத்தின் மூலம் வறட்சி மற்றும் வெள்ள அபாயங்களை சமாளிக்கும் நகரத்தின் திறன் மேம்படுத்தப்படுவதுடன், நீர்வள முகாமைத்துவம் தொடர்பான சர்வதேச சிறந்த நடைமுறைகள் பகிரப்பட்டு செயல்படுத்தப்படவுள்ளன. மேலும் மாநகர சபையின் தொழில்நுட்ப மற்றும் நிர்வாகத் திறன்கள் வலுப்படுத்தப்பட்டு, நிலையான நகர அபிவிருத்தி மற்றும் காலநிலை மாற்றத்திற்கான தழுவல் நடவடிக்கைகள் முன்னெடுக்கப்படவுள்ளன.

அதேவேளை, திட்டத்தை வெற்றிகரமாக நடைமுறைப்படுத்தவும் எதிர்கால அபிவிருத்தித் திட்டங்களுக்குத் தேவையான நிதி மற்றும் தொழில்நுட்ப ஆதரவுகளைப் பெற்றுக்கொள்ளவும் தென்கிழக்குப் பல்கலைக்கழகத்தின் மூத்த கல்வியாளர்கள் நிபுணத்துவ ஆலோசகர்களாக இணைக்கப்படுவதற்கும் மாநகர சபை அங்கீகாரம் வழங்கியுள்ளது.

இந்த சர்வதேச அங்கீகாரம் அக்கரைப்பற்று மாநகர சபை, அம்பாறை மாவட்டம், கிழக்கு மாகாணம் மற்றும் இலங்கை நாட்டிற்கு சர்வதேச அரங்கில் பெருமை சேர்க்கும் முக்கியமான சாதனையாகக் கருதப்படுகிறது.

மேலும், இந்த வெற்றியானது அக்கரைப்பற்று மாநகர முதல்வரும் தேசிய காங்கிரஸ் தலைவருமான A.L.M. அதாஉல்லா அவர்களின் அபிவிருத்தி நோக்கு, நிர்வாக அனுபவம் மற்றும் தூரநோக்குச் சிந்தனையின் பிரதிபலிப்பாகப் பார்க்கப்படுகின்றமை குறிப்பிடத்தக்கது.

நிருபர் – எம் என் முஹம்மது

1. அக்கரைப்பற்று, அட்டாளைச்சேனை, ஆலையடிவேம்பு மற்றும் இறக்காமம் விவசாய அமைப்புகள் ஒன்றிணைந்து நெல் கொள்வனவு கோரி பாரிய கவனயீர்ப்பு பேரணி.
2. வெளிநாட்டு அரிசி இறக்குமதியை உடனடியாக நிறுத்துமாறு ஜனாதிபதி அநுர குமார திஸாநாயக்கவிற்கு விசேட மகஜர் கையளிப்பு.
3. தற்போதைய நிர்ணய விலையான 120 ரூபாவுக்கே நெல்லை வாங்க மில் உரிமையாளர்கள் தயக்கம்; அடிமட்ட விலைக்கு விற்க நேரிடுவதால் விவசாயிகளுக்கு பாரிய நஷ்டம்.

நெல் கொள்வனவு நெருக்கடி: அம்பாறையில் வெடித்த விவசாயிகளின் போராட்டம்!

எதிர்வரும் ஜூலை மாதம் முதல் வாரத்தில் 2026 ஆம் ஆண்டுக்கான சிறுபோக (யால) அறுவடை களைகட்டவுள்ள நிலையில், கிழக்கு மாகாண விவசாயிகளின் முகங்களில் மகிழ்ச்சிக்கு பதிலாக மரண பயமே குடிகொண்டுள்ளது.

தமது வியர்வையின் பலனுக்கு நியாயமான விலை கிடைக்குமா என்ற ஏக்கத்துடன் அக்கரைப்பற்று, அட்டாளைச்சேனை, ஆலையடிவேம்பு மற்றும் இறக்காமம் ஆகிய பிரதேசங்களைச் சேர்ந்த விவசாயிகள் இன்று வீதியில் இறங்கியுள்ளனர். நெல் கொள்வனவு மற்றும் நியாயமான விலை நிர்ணயத்தை வலியுறுத்தி முன்னெடுக்கப்பட்ட இந்த கவனயீர்ப்பு பேரணியின் முடிவில், அக்கரைப்பற்று பிரதேச செயலகத்தில் தமது உருக்கமான கோரிக்கைகள் அடங்கிய மகஜரொன்றும் கையளிக்கப்பட்டது.

இந்த மகஜர் நேரடியாக ஜனாதிபதி அநுர குமார திஸாநாயக்க அவர்களின் கவனத்திற்கு கொண்டு செல்லப்படவுள்ளமை இங்கு சுட்டிக்காட்டத்தக்கது. எதிர்வரும் சிறுபோக அறுவடை நெல்லினை அரசாங்கம் உடனடியாகக் கொள்வனவு செய்ய வேண்டும், அத்துடன் ஒரு கிலோ நெல்லுக்கான குறைந்தபட்ச விலையை 140 ரூபாவாக நிர்ணயிக்க வேண்டும் என்பதே விவசாயிகளின் அதிரடி கோரிக்கையாகும்.

இதற்குப் பின்னணியில் உள்ள கசப்பான உண்மை என்ன தெரியுமா? அரசாங்கம் ஏற்கனவே ஒரு கிலோ நெல்லுக்கு 120 ரூபா என விலை நிர்ணயித்துள்ள போதிலும், மில் உரிமையாளர்கள் அந்த விலைக்கு முழுமையாக நெல்லைக் கொள்வனவு செய்யத் தயங்குகின்றனர். இதனால், வேறு வழியின்றி தரகர்களிடமும், வியாபாரிகளிடமும் அடிமட்ட விலைக்கு தமது நெல்லை விற்க வேண்டிய துர்ப்பாக்கிய நிலைக்கு விவசாயிகள் தள்ளப்பட்டுள்ளனர். இந்த நஷ்டம் தொடருமானால், எதிர்காலத்தில் எந்தவொரு இளைஞரும் விவசாயத் துறையை நோக்கி வரமாட்டார்கள் என்ற அபாய எச்சரிக்கையையும் அவர்கள் விடுத்துள்ளனர்.

பிரச்சினை விலை நிர்ணயத்துடன் மட்டும் முடிவடைந்துவிடவில்லை. உள்ளூர் களஞ்சியசாலைகளில் ஏற்கனவே நெல் மலைபோல் தேங்கிக் கிடக்கிறது. அதனை உடனடியாக அப்புறப்படுத்த நடவடிக்கை எடுப்பதுடன், வெளிநாடுகளிலிருந்து அரிசி இறக்குமதி செய்யப்படுவதை அரசாங்கம் முற்றாக நிறுத்த வேண்டும் எனவும் விவசாயிகள் ஆவேசமாக கோரிக்கை விடுத்துள்ளனர். உள்ளூர் விவசாயி நஷ்டத்தில் தவிக்கும்போது, வெளிநாட்டு அரிசி எதற்கு என்பது அவர்களின் நியாயமான கேள்வியாக உள்ளது.

எவ்வாறாயினும், இது அரசாங்கத்திற்கு எதிரான எந்தவொரு அரசியல் போராட்டமும் அல்ல என்பதை பேரணியில் கலந்து கொண்ட விவசாய அமைப்புகளின் பிரதிநிதிகள் திட்டவட்டமாகத் தெரிவித்தனர். மாறாக, தேங்கிக் கிடக்கும் நெல்லை உடனடியாக கொள்வனவு செய்து, விவசாயிகளின் வாழ்வாதாரத்தைக் காப்பாற்றுமாறு ஜனாதிபதிக்கும், சம்பந்தப்பட்ட அதிகாரிகளுக்கும் விடுக்கும் ஒரு ‘அவசர அபயக் குரல்’ இதுவாகும். ஜூலை மாத அறுவடைக்கு முன்னர் அரசாங்கம் இவர்களின் குரலுக்கு செவிசாய்க்குமா என்பதை பொறுத்திருந்தே பார்க்க வேண்டும்!

• கற்பிட்டி இராணுவப் பயிற்சித் தளத்தில் விமானப்படையினருக்கும் பொலிஸ் அதிகாரி உள்ளிட்ட குழுவினருக்கும் இடையில் திடீர் மோதல் நிலை.
• அதிஉயர் பாதுகாப்பு வலயத்திற்குள் அத்துமீறி நுழைந்த மூவரால் வெடிகுண்டு செயலிழக்கச் செய்யும் பயிற்சியில் கடும் இடையூறு.
• விசாரணையில் பிடிபட்ட பொலிஸ் அதிகாரியும் இரு பொதுமக்களும் – தடித்த வார்த்தைகளால் முற்றிய வாக்குவாதம்.
• சம்பவம் குறித்து முழுமையான விசாரணை நடத்தி அறிக்கை சமர்ப்பிக்க விமானப்படை தளபதியால் விசேட விசாரணைச் சபை நியமனம்.

டெய்லி மிரர்: கற்பிட்டியிலுள்ள விமானப்படைக்கு சொந்தமான துப்பாக்கிச் சூட்டுப் பயிற்சித் தளத்தில் கடந்த 17ஆம் திகதி வழமையான இராணுவப் பயிற்சி ஒன்று போய்க்கொண்டிருந்தது. சும்மா சாதாரண பயிற்சி அல்ல, எந்நேரமும் வெடிக்கக்கூடிய ஆபத்தான வெடிகுண்டுகளை செயலிழக்கச் செய்யும் (Bomb Disposal Exercise) அதிமுக்கியமானதொரு ஒத்திகை அது. இதனால் அந்தப் பகுதி முழுவதும் பொதுமக்களுக்கு தடைசெய்யப்பட்ட, அதிஉயர் பாதுகாப்பு வலயப் பிரதேசமாக பிரகடனப்படுத்தப்பட்டிருந்தது.

விமானப்படை வீரர்கள் தங்களது கடமைகளில் தீவிரமாக இருந்த அந்த வேளையில்தான், யாரும் எதிர்பாராத விதமாக ஒரு ட்விஸ்ட் அரங்கேறியது. முறையான எவ்வித அனுமதியோ அல்லது முன்னறிவித்தலோ இன்றி, பாதுகாப்பு வேலிகளைத் தாண்டி மூன்று நபர்கள் திடீரென அந்த ஆபத்தான பகுதிக்குள் நுழைந்தனர். குண்டுகள் வெடிக்கும் பகுதியில் மனித நடமாட்டம் இருப்பதை அவதானித்த பாதுகாப்புப் படையினர் உடனடியாக சுதாரித்துக்கொண்டனர்.

அங்கிருந்த விமானப்படை வீரர்களும், பொலிஸ் விசேட அதிரடிப்படையைச் (STF) சேர்ந்த அதிகாரியொருவரும் இணைந்து, அத்துமீறி நுழைந்த அந்த மூவரையும் இடைமறித்து தீவிர விசாரணைக்கு உட்படுத்தினர். இதன்போதுதான் அந்த அதிர்ச்சி உண்மை வெளிவந்தது. பிடிபட்ட மூவரில் ஒருவர் சாதாரண சிவிலியன் உடையில் இருந்த பொலிஸ் அதிகாரி என்பதும், மற்றைய இருவருமே அவருடன் வந்த பொதுமக்கள் என்பதும் தெரியவந்தது.

ஏன் இந்த பகுதிக்குள் வந்தீர்கள் என அதிகாரிகள் கேள்வி எழுப்பியபோது, அங்கு நிலைமை கைமீறிப்போனது. இரு தரப்பினருக்கும் இடையே கடுமையான வாக்குவாதம் ஏற்பட்டு, வார்த்தைப் போர் முற்றியது. ஆபத்தான வலயத்தில் மக்களின் உயிரைப் பாதுகாக்கவே தாங்கள் விதிகளைப் பின்பற்றி கடமையாற்றியதாக விமானப்படை அதிகாரிகள் தரப்பில் தெரிவிக்கப்படுகிறது.

இலங்கை பாதுகாப்புத் துறையில் பெரும் பரபரப்பை ஏற்படுத்தியுள்ள இந்த மோதல் சம்பவம் குறித்து, தற்போது இலங்கை விமானப்படைத் தளபதி நேரடி கவனஞ்செலுத்தியுள்ளார். சம்பவம் தொடர்பில் பக்கச்சார்பற்ற மற்றும் விரிவான விசாரணைகளை மேற்கொண்டு, அவசர அறிக்கை சமர்ப்பிக்குமாறு விசேட விசாரணைச் சபை (Board of Inquiry) ஒன்றையும் அவர் அவசரமாக நியமித்துள்ளார். பாதுகாப்பு வலயத்தில் நடந்த இந்த அத்துமீறலின் பின்னணியில் உள்ள உண்மை என்ன என்பது இந்த அதிகாரப்பூர்வ அறிக்கை வெளியான பின்னரே முழுமையாகத் தெரியவரும்.

வலிகாமம் வடக்கு பிரதேச அபிவிருத்தி குழுக்கூட்டத்தின் போது, பாராளுமன்ற உறுப்பினர்களான இராமநாதன் அர்ச்சுனா மற்றும் கஜேந்திரகுமார் பொன்னம்பலம் ஆகியோருக்கு இடையே கடும் வாக்குவாதம் இடம்பெற்றமையினால் சபையில் அமைதியின்மை ஏற்பட்டது.  

குறித்த பிரதேச சபையின் அபிவிருத்திக்குழுக் கூட்டம் அதன் தலைவர் ஶ்ரீபவாநந்தராஜா தலைமையில் நேற்று (18) கூடியது.  

இதன்போது தெல்லிப்பழை ஆதார வைத்தியசாலை மற்றும் அதன் புற்றுநோய் சிகிச்சை பிரிவை மத்திய அரசாங்கத்தின் கீழ் கொண்டு வருவதற்கான யோசனை ஒன்று முன்வைக்கப்பட்டது.  

இந்த யோசனைக்கு பாராளுமன்ற உறுப்பினர் கஜேந்திரகுமார் பொன்னம்பலம் தமது எதிர்ப்பை தெரிவித்தார்.  

அது தொடர்ந்தும் மாகாண சபை நிர்வாகத்தின் கீழேயே இயங்க வேண்டும் என தெரிவித்ததுடன், குறித்த வைத்தியசாலையின் அபிவிருத்திக்கு அரசாங்கத்தினால் முறையாக நிதி ஒதுக்கப்படுவதில்லை எனவும் அவர் குற்றஞ்சாட்டினார்.  

எவ்வாறாயினும் வைத்தியசாலையின் அபிவிருத்தியை கருத்திற் கொண்டு அந்த வைத்தியசாலை மத்திய அரசாங்கத்தின் கீழ் கொண்டுவரப்பட வேண்டும் என அர்ச்சுனா வலியுறுத்தினார்.  

இதன்போது பாராளுமன்ற உறுப்பினர்களான இராமநாதன் அர்ச்சுனாவுக்கும், கஜேந்திரகுமார் பொன்னம்பலம் ஆகியோருக்கும் இடையில் கடும் வாக்குவாதம் ஏற்பட்டது.  

இதனால் அபிவிருத்திக் குழு கூட்டத்தின் போது அமைதியின்மை ஏற்பட்டது.  

இந்நிலையில் இன்றைய தினம் நடைபெறவுள்ள மாவட்ட அபிவிருத்திக் குழுக் கூட்டத்தில், குறித்த வைத்தியசாலையை மத்திய அரசாங்கத்தின் கீழ் கொண்டு வருவதற்கான யோசனையை முன்வைக்க அபிவிருத்திக் குழு தலைவர் நேற்றைய தினம் தீர்மானித்தார்.  

ஏதேனும் ஆட்சேபனைகள் இருப்பின் அங்கு தெரிவிக்க முடியும் எனவும் அவர் குறிப்பிட்டார்.

முஸ்லிம் ஊடகங்கள் தொடர்பான பாராளுமன்ற உரைக்கு அதிருப்தி!

பிரதியமைச்சர் முனீர் முளப்பருக்கு ஶ்ரீ லங்கா முஸ்லிம் மீடியா போரம் கடிதம்!

முஸ்லிம் ஊடகங்களைப் பிரதிநிதித்துவம் செய்வோர் இனவாத சக்திகளுக்குத் துணை போவதாக சமய விவகார மற்றும் கலாசார அலுவல்கள் பிரதியமைச்சர் முனீர் முளப்பர் அண்மையில் பாராளுமன்றத்தில் முன்வைத்த குற்றச்சாட்டு தொடர்பில் ஸ்ரீ லங்கா முஸ்லிம் மீடியா போரம் தனது அதிருப்தியை வெளியிட்டுள்ளது.

இது தொடர்பில் ஸ்ரீ லங்கா முஸ்லிம் மீடியா போரம் பிரதியமைச்சருக்கு 18.06.2026 திகதியிட்டு அனுப்பியுள்ள கடிதத்தில் மேலும் குறிப்பிடப்பட்டுள்ளதாவது,

கடந்த 11.06.2026 அன்று பாராளுமன்றத்தில் தாங்கள் உரை நிகழ்த்திய போது, “முஸ்லிம் சமூக விவகாரங்களை அறிக்கையிடும் முஸ்லிம் ஊடகங்கள், தமது செய்தி அறிக்கையிடல்கள் மூலம் இனவாத சக்திகளுக்குத் துணைபோகும் வகையில் நடந்து கொள்கின்றன” எனக் குற்றம்சாட்டியிருந்தீர்கள்.

இந்த ஆதாரமற்ற பாரதூரமான குற்றச்சாட்டு தொடர்பில் எமது பலத்த அதிருப்தியையும் கவலையையும் தங்களுக்குத் தெரியப்படுத்தும் பொருட்டே இக்கடிதத்தை அனுப்புகிறோம்.

முஸ்லிம் சமூகத்தை மையப்படுத்தி இயங்குகின்ற ஏதேனும் ஊடகங்களோ அல்லது ஊடகவியலாளர்களோ அவ்வாறான பக்கச்சார்பான பின்னணிகளைக் கொண்டிருப்பின் அல்லது தமது செய்தி அறிக்கையிடல்களில் உண்மைக்குப் புறம்பான விடயங்களை உள்ளடக்கியிருப்பின், அவற்றை ஆதாரபூர்வமாக, உரிய தரப்பினரின் பெயரை குறிப்பிட்டுச் சுட்டிக்காட்டுவதே முறையானதும் பொருத்தமானதுமாகும்.

அதனை விடுத்து, முஸ்லிம் சமூக மற்றும் சமய விவகாரங்கள் தொடர்பில் ஊடக நெறிமுறைகளைப் பேணி, நடுநிலையாக அறிக்கையிட்டு வரும் ஒட்டுமொத்த ஊடகங்களையும் உள்ளடக்கும் வகையில் தாங்கள் முன்வைத்துள்ள இக்குற்றச்சாட்டு எவ்வகையிலும் ஏற்றுக்கொள்ளப்பட முடியாததொன்றாகும்.

அண்மைக்காலங்களில் இலங்கை முஸ்லிம்கள் எதிர்கொண்ட பல்வேறு முக்கியத்துவம் வாய்ந்த விவகாரங்கள் குறித்து முஸ்லிம் ஊடகங்களும் ஊடகவியலாளர்களும் சமூகப் பொறுப்புணர்வுடன் மக்களை விழிப்பூட்டும் வகையில் செய்திகளை வெளியிட்டிருந்தனர். இது ஜனநாயகத்தின் நான்காவது தூணாக விளங்கும் ஊடகங்களின் இன்றியமையாத கடமையுமாகும்.

இவ்வாறானதொரு பின்னணியில், எவ்வித சான்றுகளுமின்றி பொதுப்படையாகத் தாங்கள் முன்வைத்த குற்றச்சாட்டு, அர்ப்பணிப்புடன் பணியாற்றும் முஸ்லிம் ஊடகவியலாளர்கள் மத்தியில் பெரும் மனவேதனையையும் ஏமாற்றத்தையும் ஏற்படுத்தியுள்ளது.

இவ்விடயம் அமைப்பின் அங்கத்தவர்களால் எமது கவனத்திற்குக் கொண்டுவரப்பட்டதை அடுத்து, கடந்த 15.06.2026 அன்று நடைபெற்ற எமது செயற்குழுக் கூட்டத்தில் இது குறித்து விரிவாக ஆராயப்பட்டு எடுக்கப்பட்ட தீர்மானத்தின் அடிப்படையிலேயே இக்கடிதம் தங்களுக்கு அனுப்பி வைக்கப்படுகிறது.

எனவே, எதிர்காலத்தில் இவ்வாறான பாரதூரமான மற்றும் பொதுப்படையான குற்றச்சாட்டுக்களை பாராளுமன்றம் உள்ளிட்ட உயரிய சபைகளில் முன்வைப்பதைத் தவிர்த்துக் கொள்ளுமாறும், தாங்கள் சபையில் முன்வைத்த மேற்படி கருத்தை திருத்திக் கொள்வதுடன், ஜனநாயகத்தின் தூண்களாக விளங்கும் ஊடகங்களின் சுயாதீன செயற்பாடுகளுக்கு மதிப்பளித்து, ஊடகவியலாளர்களின் கருத்துச் சுதந்திரத்தை உறுதிப்படுத்துமாறும் மிகவும் பணிவுடன் வேண்டிக் கொள்கிறோம் என்றும் அக் கடிதத்தில் மேலும் குறிப்பிடப்பட்டுள்ளது.

(எம் என் முஹம்மது)

அக்கரைப்பற்று மாநகர சபையில் சில எதிர்க்கட்சி உறுப்பினர்கள் கடைப்பிடித்து வரும் அரசியல் அணுகுமுறைகள் குறித்து மாநகர சபை உறுப்பினர் ஏ.சி.எம். நுஃமான் விமர்சனங்களை முன்வைத்துள்ளார்.

இது தொடர்பாக அவர் கூறுகையில்; சபைக்குள் ஆளுங்கட்சியுடன் இணக்கமாக செயல்பட்டு, தீர்மானங்களுக்கு ஆதரவு வழங்கும் சில உறுப்பினர்கள், சபைக்கு வெளியே எதிர்ப்பு அரசியலை முன்னெடுத்து வருவதாக குற்றஞ்சாட்டியுள்ளார்.

மேலும், சபையில் ஒரு நிலைப்பாடு, பொதுமக்கள் மத்தியில் மற்றொரு நிலைப்பாடு, சமூக வலைத்தளங்களில் வேறொரு நிலைப்பாடு என செயற்படுவது கொள்கை அரசியல் அல்ல என்றும், அது சந்தர்ப்பவாத அரசியலின் வெளிப்பாடாகும் என்றும் அவர் கடுமையாக விமர்சித்துள்ளார்.

மக்கள் பிரதிநிதித்துவம் என்பது அறிக்கைகள் அல்லது புகைப்பட அரசியலால் அளவிடப்படுவதில்லை என்றும், மக்களுக்காக எடுக்கப்படும் பொறுப்புணர்வான மற்றும் துணிச்சலான முடிவுகளின் அடிப்படையிலேயே மதிப்பிடப்பட வேண்டும் என்றும் அவர் குறிப்பிட்டுள்ளார்.

தேசிய காங்கிரஸின் மாநகர உறுப்பினர்களாகிய தாங்கள், மக்களுக்கு வழங்கிய வாக்குறுதிகளை நிறைவேற்றும் நோக்கில் தொடர்ந்தும் செயல்பட்டு வருவதாகவும், அக்கரைப்பற்று மாநகர மேயரும் தேசிய காங்கிரஸின் தலைவருமான கௌரவ ஏ.எல்.எம். அதாவுல்லாஹ்வின் வழிகாட்டுதலின் கீழ் அபிவிருத்தி பணிகளை முன்னெடுத்து வருவதாகவும் அவர் தெரிவித்துள்ளார்.

அதேவேளை, மக்களை குழப்பி அரசியல் ஆதாயம் தேடும் இரட்டை நிலைப்பாட்டு அரசியலை மக்களிடம் வெளிப்படுத்துவோம் என்றும் அவர் வலியுறுத்தியுள்ளார்.

அக்கரைப்பற்று மக்கள் அரசியல் விழிப்புணர்வு மிக்கவர்கள் என்பதுடன், உண்மையாக மக்களுக்காக செயற்படுபவர்களையும், தேர்தல் காலங்களில் மட்டும் குரல் கொடுப்பவர்களையும் வேறுபடுத்தி அறிந்திருப்பார்கள் எனவும் தெரிவித்தமை குறிப்பிடத்தக்கது.