அமெரிக்கா–ஈரான் போர் முடிவுக்கு வருமா?
ஞாயிற்றுக்கிழமையே வரலாற்று ஒப்பந்தம் கையெழுத்தாகலாம் – ஜெனீவாவில் தீவிர பேச்சுவார்த்தை!
உலகத்தை அதிரவைத்த அமெரிக்கா–ஈரான் மோதலுக்கு முடிவுக்கட்டும் வகையில், இரு நாடுகளுக்கும் இடையிலான போர் நிறுத்தப் புரிந்துணர்வு ஒப்பந்தம் எதிர்வரும் ஞாயிற்றுக்கிழமைக்குள் கையெழுத்தாகும் வாய்ப்பு இருப்பதாக மேற்கத்திய உயர்மட்ட வட்டாரங்கள் தெரிவித்துள்ளன.
சர்வதேச செய்தி நிறுவனம் ரொய்ட்டர்ஸுக்கு வழங்கிய தகவலின் அடிப்படையில், ஒப்பந்தத்தின் இறுதி வார்த்தை அமைப்புகள் தற்போது தீவிரமாக பரிசீலிக்கப்பட்டு வருவதாக தெரிவித்துள்ளது. இதற்கிடையில், லெபனானில் நடைபெற்று வரும் மோதல்களும் நிறுத்தப்பட வேண்டும் என்ற தனது நிலைப்பாட்டில் ஈரான் உறுதியாக உள்ளதாக கூறப்படுகிறது.
இந்த ஒப்பந்தத்தின் மொழி வடிவம் சனிக்கிழமையளவில் இறுதிப்படுத்தப்பட்டு, அமெரிக்க துணை ஜனாதிபதி ஜே.டி. வான்ஸ் மற்றும் ஈரான் நாடாளுமன்ற சபாநாயகர் முகம்மது பாகர் கலிபாஃப் ஆகியோரால் கையெழுத்திடப்படலாம் என தெரிவிக்கப்படுகிறது. இதற்கான இடம் இன்னும் அதிகாரப்பூர்வமாக உறுதி செய்யப்படவில்லை என்றாலும், சுவிட்சர்லாந்தின் ஜெனீவா நகரமே அதிக வாய்ப்புள்ள இடமாகக் கருதப்படுகிறது.
இந்நிலையில், அமெரிக்க ஜனாதிபதி டொனால்ட் டிரம்ப், ஈரான் மீது மேற்கொள்ளத் திட்டமிடப்பட்டிருந்த புதிய தாக்குதல்களை நிறுத்திவைத்துள்ளதாக அறிவித்துள்ளார்.
“ஈரானுடனான போருக்கான சிறந்த தீர்வை நாம் எட்டியுள்ளோம்,” என்று வெள்ளை மாளிகையில் செய்தியாளர்களிடம் அவர் தெரிவித்தார்.
ஆனால், தற்போது வெளியாகியுள்ள ஒப்பந்த வரைவு விவரங்கள் ஈரானின் நீண்டகால கோரிக்கைகளுக்கு அதிகளவில் சாதகமாக இருப்பதாக சர்வதேச அரசியல் ஆய்வாளர்கள் சுட்டிக்காட்டுகின்றனர்.
ஈரானின் மூத்த அதிகாரி ஒருவர் இது குறித்து ரொய்ட்டர்ஸிடம் தெரிவித்ததாவது:
- ஈரானின் எண்ணெய் ஏற்றுமதிக்கு விதிக்கப்பட்டுள்ள தடைகள் நீக்கப்பட வேண்டும்.
- முடக்கி வைக்கப்பட்டுள்ள பில்லியன் கணக்கான டொலர் நிதிகள் விடுவிக்கப்பட வேண்டும்.
- லெபனானை உள்ளடக்கிய அனைத்து முனைகளிலும் போர் நடவடிக்கைகள் நிறுத்தப்பட வேண்டும்.
அணு ஆயுத விவகாரம் பின்னர் நடைபெறும் தனிப்பட்ட பேச்சுவார்த்தைகளில் எடுத்துரைக்கப்படும் என்றும் கூறப்படுகிறது. அமெரிக்கா, ஈரான் ஒருபோதும் அணு ஆயுதம் உருவாக்கக்கூடாது என்பதில் வலியுறுத்தி வரும் நிலையில், தாம் அணு ஆயுதங்களை உருவாக்க முயற்சிக்கவில்லை என்று ஈரான் தொடர்ந்து மறுத்து வருகிறது.
மேலும், ஈரானின் அரச செய்தி நிறுவனமான “மெஹர்”, அமெரிக்கா தனது படைகளை ஈரானைச் சூழ்ந்துள்ள பகுதிகளிலிருந்து விலக்கிக் கொள்ளும் உறுதியையும், போர் காரணமாக பாதிக்கப்பட்ட ஈரான் பொருளாதாரத்தை மீளமைப்பதற்கான திட்டத்தையும் சமர்ப்பிக்க ஒப்புக்கொண்டுள்ளதாக செய்தி வெளியிட்டுள்ளது.
அதன்படி, “ஈரானின் மறுசீரமைப்புக்காக குறைந்தபட்சம் 300 பில்லியன் அமெரிக்க டொலர் மதிப்பிலான திட்டங்களை அமெரிக்காவும் அதன் கூட்டாளிகளும் சமர்ப்பிக்க வேண்டும்” என தெரிவிக்கப்பட்டுள்ளது.
டிரம்பின் இந்த அறிவிப்பு உலக நிதிச் சந்தைகளிலும் உடனடி தாக்கத்தை ஏற்படுத்தியுள்ளது. உலக பங்குச் சந்தைகள் ஏற்றம் கண்டதுடன், சர்வதேச எண்ணெய் விலைகள் வீழ்ச்சியடைந்தன. பிரெண்ட் கச்சா எண்ணெய் விலை ஐரோப்பிய சந்தை வர்த்தகத்தில் இரண்டு சதவீதத்திற்கும் அதிகமாக குறைந்ததாக தகவல்கள் தெரிவிக்கின்றன.
எனினும், கடந்த காலங்களில் பலமுறை “ஒப்பந்தம் விரைவில் உருவாகும்” என டிரம்ப் அறிவித்தபோதும் அவை நடைமுறைக்கு வராத அனுபவம் இருப்பதால், தற்போதைய முன்னேற்றமும் எச்சரிக்கையுடன் கவனிக்கப்பட்டு வருகிறது.
இதற்கிடையில், ஹோர்முஸ் நீரிணையைச் சுற்றியுள்ள பதற்றம் இன்னும் முழுமையாக தணியவில்லை. வணிகக் கப்பல்களை குறிவைத்து ஈரான் மேற்கொண்டதாகக் கூறப்படும் ட்ரோன் தாக்குதல் முயற்சிகளை அமெரிக்க படைகள் முறியடித்துள்ளதாக அதிகாரிகள் தெரிவித்துள்ளனர். மேலும், ஹோர்முஸ் வழியாகச் செல்ல முயன்ற ஒரு எண்ணெய் கப்பலை ஈரான் தடுத்து நிறுத்தியதாகவும், அப்பகுதியில் வெடிப்பு சத்தங்கள் கேட்கப்பட்டதாகவும் ஈரான் அரச ஊடகங்கள் செய்தி வெளியிட்டுள்ளன.
இந்தப் போர் அமெரிக்க உள்நாட்டு அரசியலிலும் பெரும் சவாலாக மாறியுள்ளது. எரிபொருள் விலை உயர்வால் வாக்காளர்கள் அதிருப்தியடைந்துள்ள நிலையில், ஜனாதிபதி டிரம்பின் மக்கள் ஆதரவு குறைந்து வருவதாக கருத்துக் கணிப்புகள் தெரிவிக்கின்றன. வரவிருக்கும் இடைத்தேர்தல்களில் காங்கிரஸ் கட்டுப்பாட்டை இழக்க நேரிடுமோ என்ற அச்சத்தையும் சில குடியரசுக் கட்சி உறுப்பினர்கள் வெளிப்படையாகத் தெரிவித்துள்ளனர்.
மற்றொரு புறம், லெபனானில் போர் நிறுத்தம் மேற்கொள்ளப்பட வேண்டும் என்ற நிபந்தனை இஸ்ரேலுக்கு ஏற்றதாக இருக்காது என கருதப்படுகிறது. ஏனெனில், அமெரிக்காவுடன் இணைந்து போரில் ஈடுபட்டிருந்த இஸ்ரேல், தற்போதைய சமாதான பேச்சுவார்த்தைகளில் நேரடியாக பங்கேற்கவில்லை.
இந்நிலையில், பிரதமர் பெஞ்சமின் நெதன்யாகுவின் அலுவலகம் வெளியிட்டுள்ள அறிக்கையில், “ஈரானுடன் மேற்கொள்ளப்படும் எந்தவொரு புரிந்துணர்வு ஒப்பந்தத்திலும் இஸ்ரேல் தரப்பாக இல்லை” என்று தெரிவிக்கப்பட்டுள்ளது.
உலகின் மிக முக்கியமான கடல் வர்த்தகப் பாதைகளில் ஒன்றான ஹோர்முஸ் நீரிணை மீண்டும் திறக்கப்படுமா? மத்திய கிழக்கை அதிரவைத்த இந்தப் போர் உண்மையிலேயே முடிவுக்கு வருமா? ஜெனீவாவில் நடைபெறவுள்ள இந்த வார இறுதி பேச்சுவார்த்தைகள், உலக அரசியலின் புதிய அத்தியாயத்தை எழுதப்போகின்றன.
