குவைத் விமான நிலையம் மீது ட்ரோன் தாக்குதல் நடத்தப்பட்டிருப்பது அதிர்ச்சியை ஏற்படுத்தியிருக்கிறது. இந்த தாக்குதலில் உயிரிழப்பு ஏதும் ஏற்படவில்லை என்றாலும், பயணிகள் விமான நிலையம் மீது நடத்தப்பட்டிருக்கும் தாக்குதல் பெரும் அச்சத்தை ஏற்படுத்தியிருக்கிறது.

குவைத் சர்வதேச விமான நிலையம் மீது, ஒன்றுக்கும் மேற்பட்ட தாக்குதல் நடத்தப்பட்டிருப்பதை அந்நாட்டு செய்தி ஊடகமான ‘KUNA’ தெரிவித்திருக்கிறது.

இந்த தாக்குதலில், விமான நிலையத்தின் ரேடார் அமைப்பு பாதிக்கப்பட்டிருக்கிறது. உயிரிழப்பு, காயம் ஏற்படவில்லை என்பதை குவைத் சிவில் விமான போக்குவரத்து ஆணையம் உறுதி செய்திருக்கிறது.

இந்தத் தாக்குதலுக்குப் பின்னால் யார் இருக்கிறார்கள் என்பது குறித்த விரிவான விசாரணையை பாதுகாப்பு அமைப்புகள் தொடங்கியுள்ளன. ரேடார் அமைப்பு சேதமடைந்துள்ளதால், விமானப் போக்குவரத்து மற்றும் சிக்னல் பெறுவதில் தற்காலிகத் தடைகள் அல்லது தாமதங்கள் ஏற்பட வாய்ப்புள்ளது.

மத்திய கிழக்கு பிராந்தியத்தில் ஏற்கனவே பதற்றமான சூழல் நிலவி வரும் நிலையில், குவைத் மீதான இந்தத் தாக்குதல் சர்வதேச அளவில் கவனத்தைப் பெற்றுள்ளது.

ஏற்கெனவே சவுதி, அமீரகம் உள்ளிட்ட நாடுகளின் விமா நிலையங்கள் மீதும் தாக்குதல் நடத்தப்பட்டிருக்கிறது. இந்நிலையில், தற்போது நடந்திருக்கும் தாக்குதல், மத்திய கிழக்கில் இன்னும் பதற்றம் கொஞ்சமும் குறையவில்லை என்பதை வெளிப்படுத்தியிருக்கிறது.

ஈரானின் மறைந்த ஷா மன்னரின் மகனும், தற்பொழுது புலம்பெயர்ந்து வாழ்ந்து வருபவருமான பட்டத்து இளவரசர் ரெசா பஹ்லவி, அமெரிக்காவில் நடைபெற்ற அரசியல் மாநாட்டில் ஆற்றிய உரை சர்வதேச அளவில் பெரும் விவாதத்தை ஏற்படுத்தியுள்ளது.

ஈரானில் தற்போதைய ஆட்சி மாற்றத்திற்கான தனது தயார் நிலையை அவர் வெளிப்படையாக அறிவித்துள்ளார்.

அமெரிக்காவின் டெக்சாஸ் மாகாணத்தில் கடந்த மார்ச் 28 மற்றும் 29 ஆகிய தேதிகளில் நடைபெற்ற CPAC (Conservative Political Action Conference) 2026 மாநாட்டில் பஹ்லவி கலந்துகொண்டார். அங்கு ஆற்றிய உரையில், ஈரானின் தற்போதைய ஆட்சியாளர்களுடன் எந்தவித பேச்சுவார்த்தையும் நடத்த வேண்டாம் என அமெரிக்காவிற்கும் அதன் நட்பு நாடுகளுக்கும் அவர் கோரிக்கை விடுத்தார். “ஈரானிய ஆட்சியாளர்களுடனான விவகாரத்தை இப்போதே முடித்துவிடுங்கள்” (Finish the job) என்று அவர் ஆக்ரோஷமாகப் பேசினார்.

ஈரானில் தற்போதைய இஸ்லாமியக் குடியரசு வீழ்ச்சியடைந்தால், அதிகாரத்தை உடனடியாகப் பொறுப்பேற்கத் தான் தயாராக இருப்பதாக பஹ்லவி அறிவித்தார். இதற்காக ஈரானுக்கு உள்ளேயும் வெளியேயும் உள்ள நிபுணர்களைக் கொண்டு ஒரு “இடைக்கால ஆட்சி அமைப்பு” ஏற்கனவே உருவாக்கப்பட்டுத் தயாராக இருப்பதாகவும் அவர் தெரிவித்தார்.

180 நாட்கள் நீடிக்கும் இந்த இடைக்கால ஆட்சிக்குப் பிறகு, நாட்டில் பொது வாக்கெடுப்பு நடத்தப்படும் என்றும் அவர் உறுதியளித்துள்ளார்.

ஈரானின் அணுசக்தி நிலையங்கள் மற்றும் ராணுவக் கட்டமைப்புகள் மீது அமெரிக்கா மற்றும் இஸ்ரேல் நடத்திய தாக்குதல்களை அவர் பாராட்டியது இந்த உரையில் மிகவும் சர்ச்சைக்குரிய விஷயமாகப் பார்க்கப்படுகிறது.

இந்தத் தாக்குதல்கள் ஆட்சியின் வீழ்ச்சியை வேகப்படுத்தும் என்றும், இதன் மூலம் உயிரிழப்புகளைக் குறைக்க முடியும் என்றும் அவர் தெரிவித்துள்ளார். மேலும், ஈரானிய பாதுகாப்புப் படையினர் தற்போதைய ஆட்சிக்கான ஆதரவைக் கைவிட்டு மக்கள் பக்கம் சேர வேண்டும் என்றும் அவர் அழைப்பு விடுத்துள்ளார்.

பஹ்லவியின் இந்தப் பேச்சுக்கு ஈரான் அரசு கடும் கண்டனம் தெரிவித்துள்ளது. அவரை வெளிநாட்டு சக்திகளின் “கைப்பாவை” என்று வர்ணித்துள்ள ஈரான் ஊடகங்கள், அவர் பயங்கரவாதத்தைத் தூண்டுவதாகக் குற்றம் சாட்டியுள்ளன. அதேசமயம், ஈரானுக்குள்ளும் பல போராட்டக்காரர்கள் இவரை ஒரு மதச்சார்பற்ற தலைவராகப் பார்த்தாலும், வெளிநாட்டு ராணுவத் தலையீட்டை அவர் ஆதரிப்பது நாட்டின் இறையாண்மைக்கு ஆபத்து என்று ஒரு தரப்பினர் அச்சம் தெரிவிக்கின்றனர்.

பஹ்லவியின் இந்தத் திடீர் அரசியல் நகர்வுகள் மத்திய கிழக்கு பிராந்தியத்தில் பெரும் பரபரப்பை ஏற்படுத்தியுள்ளன. ஈரானின் எதிர்காலத்தை நோக்கிய இந்தப் போர் மேகங்கள் மற்றும் அரசியல் மாற்றங்கள் சர்வதேச அரசியலில் முக்கியத் திருப்பமாகப் பார்க்கப்படுகின்றன.

துபாயில் அமைந்துள்ள உக்ரைன் நாட்டின் ட்ரோன்-எதிர்ப்பு அமைப்புகளின் கிடங்கை தாக்கி அழித்ததாக ஈரான் ராணுவம் அறிவித்துள்ளது. ஐக்கிய அரபு அமீரகத்திற்கு உக்ரைன் அதிபர் ஜெலன்ஸ்கி திடீர் பயணம் மேற்கொண்டுள்ள நிலையில், அமெரிக்கப் படைகளின் மறைவிடமாக செயல்பட்ட உக்ரைன் கிடங்கை தாக்கியதாக ஈரான் கூறியுள்ளது.

ஈரானின் இஸ்லாமிய புரட்சிகர காவற்படை (IRGC) மற்றும் அதன் கூட்டு செயல்பாட்டு மையமான காத்தம் அல்-அன்பியா (Khatam al-Anbiya) மார்ச் 28, 2026 அன்று ஒரு அதிகாரப்பூர்வ அறிவிப்பை வெளியிட்டது.

அதில், துபாயில் அமெரிக்க இராணுவத் தளபதிகள் மற்றும் வீரர்கள் பதுங்கியிருந்த இடங்களை இலக்கு வைத்து தாக்குதல் நடத்தியதாகக் கூறியது. அதே நேரத்தில், அமெரிக்கப் படைகளுக்கு உதவும் நோக்கில் துபாயில் அமைக்கப்பட்டிருந்த உக்ரைனிய ட்ரோன் எதிர்ப்பு அமைப்புகளின் (Anti-drone systems) கிடங்கை தாக்கி அழித்ததாகவும் தெரிவித்தது.

இந்தத் தாக்குதலின் போது அங்கு 21 உக்ரைனிய நிபுணர்கள் இருந்ததாகவும், அவர்கள் அனைவரும் கொல்லப்பட்டிருக்கலாம் என்றும் ஈரான் தரப்பில் உரிமை கோரப்பட்டது.

இந் நிலையில் ஈரானின் இந்த அறிவிப்பை உக்ரைன் அரசு முற்றிலுமாக மறுத்துள்ளது. இது குறித்து உக்ரைன் வெளியுறவுத்துறை அமைச்சக செய்தித் தொடர்பாளர் ஹியோர்ஹி திகி மற்றும் உக்ரைன் பாதுகாப்பு கவுன்சில் தரப்பில் விளக்கம் அளிக்கப்பட்டுள்ளது:

ஈரானின் இந்தச் செய்தி “முற்றிலும் பொயானது” என்றும், இது ஈரானிய மற்றும் ரஷ்ய அரசுகளின் திட்டமிடப்பட்ட தவறான தகவல் பரப்புதல் என்றும் அவர்கள் கூறியுள்ளனர்.

அமீரகத்தில் உக்ரைனிய நிபுணர்கள் கொல்லப்பட்டதாகக் கூறப்படுவதில் எவ்வித உண்மையும் இல்லை என அவர்கள் திட்டவட்டமாகத் தெரிவித்தனர்.

சர்வதேச செய்தி நிறுவனங்கள் ஈரானின் உரிமை கோரலைப் பதிவு செய்துள்ளனரே தவிர, உக்ரைன் கிடங்கு உண்மையில் அழிக்கப்பட்டதற்கான எவ்வித செயற்கைக்கோள் படங்களோ அல்லது தரைமட்ட ஆதாரங்களோ இதுவரை உறுதிப்படுத்தப்படவில்லை.

ஈரான் இத்தாக்குதலை நடத்தியதாகக் கூறினாலும், உக்ரைன் மற்றும் ஐக்கிய அரபு அமீரகத் தரப்பிலிருந்து இதற்கு எவ்வித அதிகாரப்பூர்வ உறுதிப்படுத்தலும் வழங்கப்படவில்லை என்பது குறிப்பிடத்தக்கது.

நவீன வரலாற்றிலேயே மிக மோசமான எரிசக்தி நெருக்கடியைச் சந்தித்து வரும் பாகிஸ்தான், தனது 20 கப்பல்களை ஹார்முஸ் நீரிணை வழியாகச் செலுத்த ஈரானுடன் ஒரு முக்கியமான ஒப்பந்தத்தைப் பெற்றுள்ளது. பாகிஸ்தானின் இந்த நடவடிக்கையை அந்நாட்டின் வெளியுறவுத்துறை அமைச்சர் இஷாக் தார் உறுதிப்படுத்தியுள்ளார்.

இந்த ஒப்பந்தத்தின்படி, பாகிஸ்தான் கொடியுடன் கூடிய 20 கப்பல்கள் ஹார்முஸ் நீரிணை வழியாகப் பயணிக்க ஈரான் அனுமதி அளித்துள்ளது.

நாளொன்றுக்கு இரண்டு கப்பல்கள் வீதம் இந்த நீரிணையைக் கடக்கும் என்று இஷாக் தார் தனது சமூக வலைதளப் பக்கத்தில் தெரிவித்துள்ளார். இந்த முடிவை “அமைதிக்கான முன்னோடி” மற்றும் ஒரு “வரவேற்கத்தக்க ஆக்கப்பூர்வமான நடவடிக்கை” என்று அவர் பாராட்டியுள்ளார்.

கடந்த பிப்ரவரி 28 அன்று ஈரான் மீது அமெரிக்கா மற்றும் இஸ்ரேல் நடத்திய ஒருங்கிணைந்த தாக்குதல்களில் ஈரானின் உயர்மட்டத் தலைவர் அலி கமேனி கொல்லப்பட்டதைத் தொடர்ந்து, ஹார்முஸ் நீரிணை போக்குவரத்து முடக்கப்பட்டுள்ளது. இந்தப் போரில் ஈரானில் சுமார் 2,000 பேரும், லெபனானில் 1,100-க்கும் மேற்பட்டோரும் உயிரிழந்துள்ளனர்.

உலக வர்த்தகத்தின் முக்கியப் பாதையாகக் கருதப்படும் இந்த நீரிணை முடங்கியதால், கச்சா எண்ணெய் விலை 40 சதவீதம் உயர்ந்து, ஒரு பேரல் 100 டாலரைத் தாண்டியுள்ளது. சுமார் 2,000 கப்பல்கள் நீரிணையின் இருபுறமும் தவித்து வரும் நிலையில், உலக வர்த்தக அமைப்பு (WTO) இதனை கடந்த 80 ஆண்டுகளில் இல்லாத மிக மோசமான பாதிப்பு என்று வர்ணித்துள்ளது.

ஈரானின் கட்டுப்பாடுகளும் கட்டணமும்:
ஈரானின் புரட்சிகர பாதுகாப்புப் படை (IRGC) தற்போது இந்த நீரிணையை ஒரு சோதனைச் சாவடியாக மாற்றியுள்ளது. இந்த வழியாகச் செல்லும் கப்பல்கள் தங்களின் சரக்கு விவரங்கள் மற்றும் குழுவினர் பட்டியலைச் சமர்ப்பித்து அனுமதி குறியீடு பெற வேண்டும். சில கப்பல்கள் இந்த நீரிணையைக் கடக்க தலா 2 மில்லியன் டாலர் வரை சீன யுவான் (Yuan) மதிப்பில் கட்டணமாகச் செலுத்தியுள்ளதாகத் தெரிகிறது. ஏற்கனவே மலேசியக் கப்பல்களுக்கும் இத்தகைய அனுமதி வழங்கப்பட்டுள்ளது குறிப்பிடத்தக்கது.

இந்த ஒப்பந்தம் பாகிஸ்தானின் தீவிர ராஜதந்திர முயற்சியின் பலனாகக் கருதப்படுகிறது. பாகிஸ்தான் ராணுவத் தளபதி பீல்டு மார்ஷல் ஆசிம் முனீர், அமெரிக்க அதிபர் டொனால்ட் ட்ரம்புடன் இது குறித்துப் பேசியுள்ளார். அதே சமயம், ஹார்முஸ் நீரிணை மீதான தனது அதிகாரத்தை சர்வதேச சமூகம் முறையாக அங்கீகரிக்க வேண்டும் என்று ஈரான் நிபந்தனை விதித்துள்ளது.

தற்போது ஈரான் மின் நிலையங்கள் மீதான தாக்குதலை அமெரிக்கா ஐந்து நாட்களுக்கு நிறுத்தி வைத்துள்ளது. இந்த அவகாசம் சனிக்கிழமையுடன் முடிவடையும் நிலையில், இஸ்ரேல் தனது தாக்குதல்களைத் தொடரும் என்று அறிவித்துள்ளது உலக நாடுகளிடையே கவலையை ஏற்படுத்தியுள்ளது.