களுத்துறை நாகொட போதனா வைத்தியசாலையை நாடிச் செல்லும் மக்களுக்கு உயர்தர, வேகமான மற்றும் வசதியான சிகிச்சை சேவையை வழங்கும் நோக்கில், 134 மில்லியன் ரூபாய்க்கும் அதிகமான அரச முதலீட்டில் முன்னெடுக்கப்பட்ட பாரிய நவீனமயமாக்கல் பணிகள் நிறைவடைந்து மக்கள் பாவனைக்கு திறந்துவிடப்பட்டுள்ளன.
சுகாதார மற்றும் வெகுசன ஊடக அமைச்சர் வைத்தியர் நளிந்த ஜயதிஸ்ஸவின் தலைமையில் இன்று (16) காலை இடம்பெற்ற விசேட நிகழ்வில், புனரமைக்கப்பட்ட பிரிவுகள் மற்றும் மேம்படுத்தப்பட்ட உட்கட்டமைப்பு வசதிகள் உத்தியோகபூர்வமாக மக்கள் சேவையில் இணைத்து வைக்கப்பட்டன. வைத்தியசாலையின் தற்போதைய கொள்ளளவை உயர்த்தி, நோயாளர்களுக்கு எவ்வித சிரமமுமின்றி சேவை வழங்குவதே இதன் பிரதான நோக்கமாகும்.
நோயாளர்கள் நேரடியாகப் பயன்படுத்தும் வெளிநோயாளர் பிரிவு (OPD), பிரதான மருந்தகம், கிளினிக்குகள், வார்டுகளுக்கான அணுகுவழிப் பாதைகள், 21 மற்றும் 22 ஆம் இலக்க விடுதிகள், சுகாதாரக் கல்விப் பிரிவு மற்றும் மனநல சிகிச்சை விடுதி என்பன அதிநவீன முறையில் புனரமைக்கப்பட்டு நோயாளர் சேவையை பலப்படுத்தியுள்ளன.
சிகிச்சை பெறும் நோயாளர்களுக்கு மாத்திரமன்றி, அர்ப்பணிப்புடன் சேவையாற்றும் சுகாதாரப் பணியாளர்களுக்கும் உகந்த பணிச்சூழலை உருவாக்கும் வகையில் வைத்தியர் விடுதி, தாதியர் ஓய்வறை மற்றும் கனிஷ்ட ஊழியர் ஓய்வறைகளும் புதுப்பிக்கப்பட்டுள்ளதுடன், புதிதாக நிர்மாணிக்கப்பட்ட சிற்றூழியர் கட்டுப்பாட்டு அலுவலகமும் அமைச்சரால் திறந்து வைக்கப்பட்டது. அத்துடன் வைத்தியசாலையின் அன்றாட பாவனைக்காக பழுதுபார்க்கப்பட்ட முச்சக்கரவண்டி ஒன்றும் கையளிக்கப்பட்டது.
நிகழ்வில் ஊடகங்களுக்கு கருத்துத் தெரிவித்த சுகாதார மற்றும் வெகுசன ஊடக அமைச்சர் வைத்தியர் நளிந்த ஜயதிஸ்ஸ, திறைசேரியிலுள்ள அரச நிதியை முறையான திட்டமிடல் மற்றும் முன்னுரிமைகளை இனங்கண்டு வினைத்திறனாகப் பயன்படுத்துவதன் மூலம், சுகாதாரத் துறைக்கு அவசியமான மனித வளங்களை முகாமைத்துவம் செய்து ஆட்சேர்ப்பு செய்யக்கூடிய சூழல் உருவாகியுள்ளதாகத் தெரிவித்தார்.
கல்முனை வடக்கு வைத்தியசாலை சீருடை விவகாரம்: முஸ்லிம் சமூகத்தை வம்புக்கு இழுக்கும் முயற்சி – ஹக்கீம் குற்றச்சாட்டு!
கல்முனை வடக்கு ஆதார வைத்தியசாலையில் முஸ்லிம் தாதியர்களின் சீருடை தொடர்பாகத் தற்போது தோற்றுவிக்கப்பட்டிருக்கும் சர்ச்சையானது, முஸ்லிம் சமூகத்தைத் தேவையில்லாமல் வம்புக்கு இழுப்பதற்காக மேற்கொள்ளப்படும் ஒரு விஷமத்தனமான முயற்சியாகும் என ஸ்ரீலங்கா முஸ்லிம் காங்கிரஸின் தலைவரும், கண்டி மாவட்ட பாராளுமன்ற உறுப்பினருமான ரவூப் ஹக்கீம் பகிரங்கமாகக் குற்றஞ்சாட்டியுள்ளார்.
கொழும்பு தபால் தலைமையக கேட்போர் கூடத்தில் நேற்று (15) நடைபெற்ற “இளஞ்சிறகுகள்” சிறுவர் நூல் வெளியீட்டு விழாவில் பிரதம அதிதியாகக் கலந்து கொண்டு உரையாற்றுகையிலேயே அவர் இக்கருத்துகளை வெளியிட்டார்.
அங்கு அவர் தொடர்ந்து உரையாற்றுகையில், சமகால விடயம் குறித்து நான் எதுவும் பேசவில்லை என முகநூலில் விமர்சிக்கிறார்கள். ஏனென்றால், இவ்விடயத்தை முள்ளை முள்ளால் தான் எடுக்க வேண்டும். நான் முகநூலில் போய் சண்டைக்குப் போக முடியாது. அது பேச வேண்டிய இடத்தில் பேசி, அதற்கு முடிவு காண வேண்டும்.
ஆனால், இதில் புரியாத புதிராக இருக்கிற விடயம், மனோ கணேசன் சொன்னது போல், இன்றைக்கு முஸ்லிம் பெண்கள் தொழிலுக்குப் போவதென்பது மிகச்சொற்பமான சில தொழில்களுக்கு மட்டும் தான்.
அதில் ஒன்று ஆசிரியர் தொழில், அடுத்தது இந்தத் தாதியர் தொழில். அதற்கும் இப்போது அண்மைக்காலமாக கொஞ்சம் கூடுதலாகப் போகிறார்கள். நிறைய முஸ்லிம் பெண்கள் மருத்துவர்களாகவும் வந்து விட்டார்கள்.
இப்போது இப்பின்னணியில், எனக்குத்தெரிந்த சில பெண் மருத்துவர்களிடம் இந்த சர்ச்சை சம்பந்தமாகவும், ‘இந்தக் காதைத்திறந்து வைக்க வேண்டும்’ என்று சொல்கிறார்களே, இது என்ன விடயம்? என்றும் கேட்டேன்.
சேர், நாங்கள் ஹிஜாப் அணிந்து தான் பணியாற்றுகிறோம். இது சும்மா உப்புச்சப்பில்லாத விடயம். நாங்கள் காதை மூடிக்கொண்டே ஸ்டெதாஸ்கோப்பைப் போட்டு ஒழுங்காக நோயைக் கண்டறிகிறோமே. அதில் என்ன பிரச்சினை இருக்கிறது?’ என்று ஒரு பெண் மருத்துவர் என்னிடம் சொல்கிறார்.
இப்படியான பின்னணியில், ஒரு சீருடையில் இப்படியான தேவையில்லாத, விஷமத்தனமான சர்ச்சையை ஏன் உருவாக்குகிறார்கள் என்பது எனக்கு ஓரளவுக்குப் புரிகிறது.
ஏனென்றால், ஏதோவொரு விடயத்திற்காக முஸ்லிம் சமூகத்தைக் கொஞ்சம் வம்புக்கு இழுக்க வேண்டும். இவ்விடயத்தில் நாங்களும் கூடக்கொஞ்சம் கவலைப்பட்டோம். சில விடயங்கள் நடந்த போது அதனுடைய பிரதிபலிப்பாக இருக்குமோ என்று நான் நினைத்தேன்.
கல்முனையில் நாய் சம்பந்தமான ஒரு விவகாரம் நடந்த போது, அங்கே மத்திய கிழக்கில் ஒரு தமிழ் சகோதரருக்குப் பிரச்சினை ஏற்பட்டிருக்கிறது. அதற்காக மிகவும் கவலைப்படுகிறோம். அந்த கொதிநிலையிலிருந்து கொண்டு, அதற்காக இதைச் செய்கிறார்களா? என்றும் ஒரு சிலர் கருத்து எழுதியிருக்கிறார்கள்.
அது எப்படி இருந்தாலும், இன்றைக்கு அரசாங்கத்திடம் இதற்கு நாங்கள் விமோசனம் கேட்கப்போனால், அது வேறு விபரீதத்தில் முடிந்து விடுமோ என்று கூட யோசிக்க வேண்டியிருக்கிறது.
ஏனென்றால், அரசாங்கத்தின் சுகாதார அமைச்சின் செயலாளராக இருப்பவர், எங்களுடைய ஜனாஸாக்கள் எரிக்கப்படுவதற்கு காரணமாக இருந்தவர். அவரிடம் தான் நாங்கள் போய் இதையெல்லாம் கேட்க வேண்டும்.
எரிக்கப்படுவதற்கு காரணமாக அவர் இருந்ததால், இன்று கொஞ்சம் வேதனைப்பட்டு கவலைப்படுவார் என நினைக்கிறேன். அதற்கான பிராயச்சித்தமாகவாவது இவ்விடயத்தில் உடனடியாக தலையிட்டு, இதற்கொரு முடிவைக்காண வேண்டும்.
நான் இங்கே மேடையில் இதைப்பற்றிப்பேசுவது எனக்கே கொஞ்சம் சங்கடமாக இருந்தாலும், நண்பர் மனோ கணேசன் தொடங்கியதால் நான் இது சம்பந்தமான விடயங்களைச் சொல்ல வேண்டும்.
ஏனென்றால், சம்பந்தப்பட்ட இந்த அதிகாரி கல்முனை RDHS-ஆக (Regional Director of Health Services) இருந்த போதும் கல்முனை தெற்கு வைத்தியசாலை உட்பட முஸ்லிம்கள் நிறைந்திருக்கின்ற ஏனைய வைத்தியசாலைகளில் இதே விதமாக ஆடை அணிந்து வந்த தாதியர் சம்பந்தமாக அவர் கண்டுகொள்ளவில்லை.
ஆனால், கல்முனை வடக்கு வைத்தியசாலைக்குப் போனவுடனே மாத்திரம் இந்த உதிப்பு எப்படி வந்தது என்பதும் புரியாத புதிராக இருக்கிறது.
எனவே, இவையெல்லாம் என்னைப்பொறுத்தமட்டில், தாதியருக்கு இன்றைக்கு நீங்கள் ‘ உங்களது காற்சட்டையைக் கழற்றி விட்டு வாருங்கள்’ என்று சொன்னால், அவர்களை நிர்வாணப்படுத்துவதற்குச் சமம்! என்பது தான் சமுதாயத்தில் இருக்கின்ற உணர்வு.
எனவே, இப்படியான சித்து விளையாட்டுகளைச் செய்வதன் மூலம் தேவையில்லாத முரண்பாடுகளைத் தோற்றுவிக்கின்ற நிலவரங்கள் குறித்துக் கவலைப்படுகின்ற அதேநேரம், இதற்கான தீர்வை அரசு விரைவாகத்தரும் என்ற நம்பிக்கையோடும், அது சம்பந்தமான அழுத்தங்கள் ஆரம்பித்து விட்டன, அதற்கான தீர்வுகள் வந்தாக வேண்டும்” எனக்குறிப்பிட்டார்.
கல்பிட்டி – கண்டக்குளி குடாவ பகுதியில் இன்று காலை இடம்பெற்ற கோர விபத்தொன்று ஒட்டுமொத்தப் பகுதியையும் பெரும் சோகத்தில் ஆழ்த்தியுள்ளது.
இன்று காலை 7.50 மணியளவில் குடாவ பகுதியிலிருந்து கரையோரமான வீதி வழியாக கல்பிட்டி பகுதியை நோக்கி மோட்டார் சைக்கிள் ஒன்று பயணித்துக் கொண்டிருந்தது. அப்போது எதிர்பாராத விதமாக பின்னால் பொலிஸ் ஜீப் வண்டி ஒன்று வருவதைக் கண்ட மோட்டார் சைக்கிள் ஓட்டுநர், திடீரெனப் பதற்றமடைந்துள்ளார்.
அந்தப் பதற்றத்தில் மோட்டார் சைக்கிளின் வேகத்தை அதிகரித்துக் கட்டுப்பாட்டை இழந்த நிலையில், வீதியோரத்திலிருந்த கம்பம் ஒன்றில் மோட்டார் சைக்கிள் மிகக் கொடூரமாக மோதியுள்ளது. இந்த அதிர்ச்சி விபத்தில் மோட்டார் சைக்கிளைச் செலுத்திய துஷ்மந்த ரோஹண (40) மற்றும் அவரது 6 வயது மகன் ரவின் கனிஷ்க ஆகிய இருவரும் படுகாயமடைந்தனர்.
படுகாயமடைந்த இருவரும் உடனடியாக மீட்கப்பட்டு அவசர அவசரமாக கல்பிட்டி வைத்தியசாலைக்கு கொண்டு செல்லப்பட்ட போதிலும், சிகிச்சை பலனின்றி இருவரும் பரிதாபமாக உயிரிழந்ததாக பொலிஸார் உறுதிப்படுத்தியுள்ளனர். விபத்து நடந்த தருணத்தில் மோட்டார் சைக்கிளைச் செலுத்திய நபர் தலைக்கவசம் அணிந்திருக்கவில்லை என்பதும் பொலிஸ் விசாரணையில் தெரியவந்துள்ளது.
இந்தத் துயரச் சம்பவத்தின் நடுவே மற்றுமொரு அதிர்ச்சித் தகவலும் வெளியாகியுள்ளது. வைத்தியசாலையில் வைக்கப்பட்டுள்ள மோட்டார் சைக்கிளைச் செலுத்திய துஷ்மந்த ரோஹண (40) உடலை பிரேதப் பரிசோதனைக்கு உட்படுத்த முற்பட்ட போது, அவரது காற்சட்டைப் பையிலிருந்து 5 மில்லிகிராம் எடையுடைய கஞ்சா போதைப்பொருள் மீட்கப்பட்டுமை பெரும் பரபரப்பை ஏற்படுத்தியுள்ளது.
குறித்த விபத்து சம்பவம் தொடர்பாக கல்பிட்டி பொலிஸார் மேலதிக விசாரணைகளைத் தீவிரமாக முன்னெடுத்து வருகின்றமை குறிப்பிடத்தக்கது.
சமூகச் சீரழிவுகள், போதை கலாச்சாரம் மற்றும் நவீன தொழில்நுட்ப சவால்களுக்கு மத்தியில் பெண் பிள்ளைகளைப் பாதுகாக்கும் முக்கிய கேடயமாக மதுரசாக்கள் விளங்குகின்றன.
மார்க்கக் கல்வியை நோக்கமாகக் கொண்டிருப்பதை விட, குடும்பப் பிளவுகள் மற்றும் பெற்றோரின் பிரச்சினைகள் காரணமாகவே பல பெண் பிள்ளைகள் மதுரசாக்களில் சேர்க்கப்படும் அதிர்ச்சிப் பின்னணி அதிகரித்துள்ளது.
தவறான நிர்ப்பந்தங்களின் அடிப்படையில் சேர்க்கப்பட்டாலும், மார்க்க வழிகாட்டல் மூலம் அந்தப் பெண் பிள்ளைகள் சமூகத்தில் சிறந்த ஆளுமைகளாக உருவெடுக்கின்றனர்.
ஒவ்வொரு முஸ்லிமும் தனது வாழ்வின் அடிப்படை வழிகாட்டியான மார்க்கக் கல்வியைப் பெற்றுக்கொள்வது ஆன்மீகக் கடமையாகும். ஆனால், இன்றைய நவீன உலகில் சமூக வலைத்தளங்களின் நச்சுத் தாக்கம், முறையற்ற தொழில்நுட்பப் பயன்பாடு மற்றும் தீவிரமாக வியாபித்து வரும் போதை கலாச்சாரம் என்பன முஸ்லிம் குடும்பங்களின் நிம்மதியை அடியோடு குலைத்து வருகின்றன. குறிப்பாக, “எமது பெண் பிள்ளைகள் இந்தச் சீரழிவுகளில் இருந்து தப்பித்து எவ்வாறு மானத்தோடும் ஒழுக்கத்தோடும் வாழப்போகிறார்கள்?” என்ற பெருங்கவலை ஒவ்வொரு விழிப்புணர்வுள்ள பெற்றோரின் இதயத்திலும் ஆறாத நெருப்பாக எரிந்துகொண்டிருக்கிறது.
இவ்வாறான நச்சுச் சூழலிலிருந்து தமது பிள்ளைகளைப் பாதுகாத்து, சிறந்த இறைபக்தியுள்ள ஆளுமைகளாக உருவாக்க வேண்டும் என்ற உன்னத நோக்கில் அரபுக் கல்லூரிகளையும் (மத்ரஸாக்களையும்) மார்க்கக் கல்வி நிலையங்களையும் நோக்கிப் பயணிக்கும் பெற்றோர்கள் ஒருபுறம் இருக்க, மறுபுறத்தில் மத்ரஸாக்களை வெறும் ‘பாதுகாப்புப் புகலிடங்களாகவும்’, ‘பிள்ளைகளின் பராமரிப்பு நிலையங்களாகவும்’ மாற்றும் ஓர் அதிர்ச்சியளிக்கும் சமூக அவலம் நாளுக்கு நாள் விஸ்வரூபம் எடுத்து வருகின்றது.
மறைக்கப்பட்ட பின்னணியும் கசப்பான சமூக யதார்த்தமும்
இறைவனின் திருப்பொருத்தத்தை நாடி, மார்க்கத்தை ஆழமாகக் கற்று சமூகத்திற்கு நற்பணி ஆற்றவேண்டும் என்ற தூய நோக்கில் சேர்க்கப்படும் பிள்ளைகளை விட, குடும்பங்களின் கடுமையான சிக்கல்களால் தள்ளிவிடப்படும் பெண் பிள்ளைகளின் எண்ணிக்கையே இன்று மத்ரஸாக்களில் அதிகமாகக் காணப்படுகின்றது.
தூய மார்க்கக் கல்வியைப் புகட்டி சமூகத்திற்குச் சிறந்த வழிகாட்டிகளை உருவாக்கும் உயரிய நோக்கோடு சில பெற்றோர்கள் தமது பெண் பிள்ளைகளை மதுரசாக்களில் சேர்த்தாலும், இதன் மறுபக்கத்தில் அதிர்ச்சியளிக்கும் ஒரு கசப்பான, பயங்கரமான யதார்த்தம் நிலவுகிறது.
குடும்பங்களில் ஏற்படும் கணவன்–மனைவி பிளவுகள், முறையற்ற உறவுகள், குடும்ப வறுமை, தாய்மார் வெளிநாடு செல்லுதல் மற்றும் பெற்றோரின் முறையற்ற நடத்தைகள் போன்ற காரணங்களால், பெண் பிள்ளைகளுக்கு ஒரு பாதுகாப்பான இடமாக மதுரசாக்களைப் பயன்படுத்தும் போக்கு அண்மைக்காலமாக அதிகரித்து வருகின்றது.
இத்தகைய மனதை உலுக்கும் குடும்பப் பின்னணிகளினால் கைவிடப்படும் அப்பாவிப் பெண் பிள்ளைகளே இன்று மத்ரஸாக்களைத் தஞ்சம் அடைகின்றனர். வீட்டில் நிலவும் போர்க்கள சூழலில் இருந்து தப்பித்து மத்ரஸா சுவர்களுக்குள் வந்து சேரும் இப்பெண் பிள்ளைகளின் உள்ளங்கள் ஏற்கனவே ஆழமான ரணங்களால் கிழிபட்டுக் கிடக்கின்றன.
தமது எவ்வித குற்றமும் இன்றி, பெற்றோரின் பொறுப்பற்ற சண்டைகளினாலும் சுயநலப் பிரிவுகளினாலும் மத்ரஸாக்களில் சேர்க்கப்படும் இந்தப் பெண் பிள்ளைகள் அனுபவிக்கும் உளவியல் மற்றும் உணர்வு ரீதியான வலிகள் வார்த்தைகளால் விவரிக்க முடியாதவை.
வார இறுதி நாட்களில் மற்ற மாணவிகளைப் பார்க்க அவர்களது பெற்றோர்கள் பாசத்தோடு பழங்களும் பலகாரங்களும் கொண்டு வரும் போது, எவரும் வராத மத்ரஸா வாசலையே வெறித்துப் பார்த்து ஏங்கி நிற்கும் அந்தச் சிறுமிகளின் மௌனக் கண்ணீர் கல்நெஞ்சையும் கரையச் செய்யும்.
இத்தகைய இக்கட்டான குடும்பப் பின்னணியில் இருந்து நிர்ப்பந்தமாக மதுரசாக்களில் சேர்க்கப்படும் பெண் பிள்ளைகளை, மார்க்க அறிஞர்களான உலமாக்கள் தங்களின் சொந்தப் பிள்ளைகளைப் போன்று அரவணைத்து வழிகாட்டுகின்றனர்.
பெற்றோரிடமிருந்து மாதாந்தக் கட்டணங்களோ, புத்தகங்கள் மற்றும் சீருடைகளுக்கான செலவுகளோ கிடைக்காத சூழ்நிலையிலும், அந்தப் பிள்ளைகளின் கல்வி மற்றும் அடிப்படைத் தேவைகளைத் தமது சொந்தப் பொறுப்பிலும் நிறுவன நிதியிலும் சுமந்து, கல்வி புகட்டும் உன்னதப் பணியை உலமாக்கள் முன்னெடுத்து வருகின்றனர்.
விடுமுறைக் கால சவால்களும் உளவியல் மீட்டெடுப்பும்
மத்ரஸாக்களுக்கு வழங்கப்படும் விடுமுறை நாட்கள் என்பது ஏனைய மாணவர்களுக்கு மகிழ்ச்சியான தருணமாக இருக்கும் வேளையில், இந்தச் சிதைந்த குடும்பத்து மாணவிகளுக்கோ அது ஒரு “நரக வேதனையாகவும் மரண பயமாகவும்” மாறுகிறது.
வீட்டுக்குச் சென்றால் அங்கே அன்பான வரவேற்போ, ஆதரவான பெற்றோரோ இருப்பதில்லை. மாறாக சண்டைகளும், அவமானங்களும், அவமதிப்புகளுமே காத்திருக்கின்றன. அத்தகைய நச்சுச் சூழலில் சிக்கும் சில பெண் பிள்ளைகள் கடுமையான மன அழுத்தத்திற்குள்ளாகி விபரீதமான, தவறான முடிவுகளை எடுக்கும் நிலைக்குத் தள்ளப்படுகின்றனர்.
இதனால், மத்ரஸா நிர்வாகத்திற்கும் ஆசிரியைகளுக்கும் ஒவ்வொரு விடுமுறைக் காலமும் பெருங்கவலையாகவே முடிகிறது:
“விடுமுறைக்குச் சென்ற நமது ஆசைப் பிள்ளை மீண்டும் உயிரோடு, ஈமானோடு, ஒழுக்கத்தோடு மத்ரஸா திரும்புமா?” என்ற அச்சமும் கேள்வியும் அவர்களின் நெஞ்சில் முள்ளாகத் தைத்துக் கொண்டே இருக்கிறது.
எனினும், மீண்டும் மதுரசாக்களுக்குத் திரும்பும் அந்த மாணவிகளுக்குத் தகுந்த உளவியல் ஆலோசனைகளையும் ஆன்மீக வழிகாட்டல்களையும் வழங்கி, அவர்களை அந்த இக்கட்டுகளிலிருந்து மீட்பதில் உலமாக்களின் பங்கு அளப்பரியதாக உள்ளது.
சாம்பலிலிருந்து எழும் பீனிக்ஸ் பறவைகள்: போராட்டமே வெற்றியின் அடித்தளம்!
பெற்றோர்களால் கைவிடப்பட்ட பிள்ளைகளுக்கு ஒரு தகப்பனின் நிழலாகவும், தாயின் கனிவாகவும் மாறி, மதுரசாக்கள் அவர்களின் கண்ணீரைத் துடைத்துத் தேற்றுகின்றது.
உளவியல் ரீதியாகப் பாதிக்கப்பட்டிருக்கும் மாணவிகளுக்கு ஆன்மீக உபதேசங்களையும், தன்னம்பிக்கையையும் ஊட்டி, அவர்களை நல்வழிப்படுத்த உலமாக்கள் செய்யும் தியாகம் எவராலும் விலைமதிக்க முடியாதது.
எத்தனையோ துயரங்கள், கண்ணீர்கள், புறக்கணிப்புகள் மற்றும் சமூக அவலங்களைத் தாண்டி, இறைவனின் அளப்பெரும் கருணையினாலும், உலமாக்களின் அர்ப்பணிப்புமிக்க வழிகாட்டலினாலும் இந்தப் பெண் பிள்ளைகள் மாபெரும் சாதனையாளர்களாக உருவெடுக்கிறார்கள்!
மத்ரஸாவில் சேர்க்கப்பட்ட ஆரம்ப நோக்கம் கசப்பானதாக இருந்தாலும், அல்லாஹ்வின் புனித வேதத்தை நெஞ்சில் சுமந்து, தூய ஹதீஸ்களின் வழிகாட்டலை கற்றுத் தேர்ந்து, சமூகத்திற்கே நல்வழி காட்டும் ஆலிமாக்களாகவும், சிறந்த அறிஞர்களாகவும், ஒரு புதிய தலைமுறையை உருவாக்கும் சிறந்த குடும்பத் தலைவிகளாகவும் அவர்கள் வரலாற்று வெற்றி அடைந்து, குடும்பத்தின் சாபக்கேடுகளிலிருந்து தங்களை விடுவித்துக்கொண்டு, சமூகத்தின் ஆசீர்வாதங்களாக இவர்கள் மலர்வது ஓர் ஆன்மீகப் பெரு அதிசயமேயாகும்!
மத்ரஸாக்கள் என்பவை குடும்பப் பிரச்சினைகளின் சுமையைத் தட்டிக்கழிக்கும் ‘பராமரிப்பு மையங்கள்’ அல்ல; அவை சமூகத்தின் ஆன்மீக கலங்கரை விளக்கங்கள்.
பெற்றோர்கள் தங்களது பொறுப்பற்ற நடத்தைகளை உணர்ந்து, குடும்ப அமைதியைப் பேண வேண்டும். அத்துடன், எவ்வித பிரதிபலனுமின்றி சமூகத்தின் இடிந்துபோன குடும்பத்துப் பிள்ளைகளைத் தத்தெடுத்து, கண்ணீர் சிந்தி அவர்களை வெற்றியாளர்களாக மாற்றும் மத்ரஸாக்களுக்கும் அர்ப்பணிப்புடன் பாடுபடும் உலமாக்களுக்கும் முழு சமூகமும் நிதி ரீதியாகவும் தார்மீக ரீதியாகவும் பக்கபலமாக நிற்க வேண்டும்.
குடும்பப் பிரச்சினைகளால் பிள்ளைகள் ஒதுக்கித் தள்ளப்படும் அவல நிலை மாறி, உண்மையான சமூக மறுமலர்ச்சிக்காகவும் இறையச்சத்திற்காகவும் மார்க்கக் கல்வியை நாடும் பொற்காலம் உருவாக நாம் அனைவரும் ஒன்றிணைந்து பிரார்த்திப்போம்!
இலங்கையின் வர்த்தகக் கட்டமைப்பு மற்றும் வரி செலுத்தும் நடைமுறைகளில் பாரிய திருத்தத்தை ஏற்படுத்தும் வகையில், புதிய பெறுமதி சேர் வரி (VAT) இன்வொய்ஸ் முறை எதிர்வரும் ஒக்டோபர் மாதம் 1ஆம் திகதி முதல் நாடளாவிய ரீதியில் கட்டாயமாக்கப்படவுள்ளது. இது தொடர்பான உத்தியோகபூர்வ அதிவிசேட வர்த்தமானி அறிவித்தலை உள்நாட்டு இறைவரித் திணைக்களம் தற்போது வெளியிட்டுள்ளது.
டிஜிட்டல் மயமாக்கல் ஊடாக நாட்டின் வரி வசூல் கட்டமைப்பை வலுப்படுத்தவும், நிதிப் பரிவர்த்தனைகளில் முழுமையான வெளிப்படைத்தன்மையை ஏற்படுத்தவும் இந்த நடவடிக்கை முன்னெடுக்கப்பட்டு வருகின்றது. குறிப்பாக, கடந்த மார்ச் மாதம் 27ஆம் திகதி இதற்கான ஆரம்ப வரைபு அறிமுகப்படுத்தப்பட்ட போதிலும், வர்த்தக சமூகத்தினரின் நடைமுறைச் சவால்கள் காரணமாக ஆரம்பத்தில் திட்டமிடப்பட்ட ஜூலை 1 நடைமுறைப்படுத்தல் ஒத்திவைக்கப்பட்டிருந்தது.
தமது நிறுவனங்களின் கணக்கியல் மென்பொருட்கள், பில்லிங் அமைப்புகள் மற்றும் டிஜிட்டல் கட்டமைப்புகளைப் புதிய VAT வடிவமைப்புக்கு ஏற்ப மாற்றியமைப்பதற்கு மேலதிக அவகாசம் தேவை என வர்த்தகர்கள் விடுத்த கோரிக்கையையே உள்நாட்டு இறைவரித் திணைக்களம் பரிசீலித்திருந்தது. அந்த வகையில் வழங்கப்பட்ட சலுகைக் காலம் தற்போது முடிவுக்கு வரவுள்ள நிலையில், அனைத்து வர்த்தக நிறுவனங்களும் ஒக்டோபர் 1ஆம் திகதிக்கு முன்னர் உரிய தொழிநுட்ப மாற்றங்களை நிறைவு செய்ய வேண்டும் எனத் திட்டவட்டமாக அறிவுறுத்தப்பட்டுள்ளது.
இந்த அதிரடி மாற்றத்திற்குப் பின்னணியில் மிக முக்கியமான வரி சீர்திருத்த நோக்கம் ஒன்று காணப்படுகின்றது. சந்தையில் புழங்கும் போலியான இன்வொய்ஸ்களை முற்றாக ஒழிப்பது, அனைத்து வணிகப் பரிவர்த்தனைகளையும் உடனுக்குடன் (Real-time) கண்காணிப்பது மற்றும் வரி வருமானம் கசிவதைத் தடுப்பதே இதன் இறுதி இலக்காகும்.
வரி ஏய்ப்பைத் தடுத்து நாட்டின் பொருளாதார ஸ்திரத்தன்மையை உறுதிப்படுத்தும் இந்த டிஜிட்டல் முறைமைக்குத் தங்களை உடனடியாகத் தகவமைத்துக் கொள்ளுமாறு அனைத்து வர்த்தகர்கள் மற்றும் வரி செலுத்துவோருக்கு உள்நாட்டு இறைவரித் திணைக்களம் அவசர எச்சரிக்கை விடுத்துள்ளது.
சிம்பாப்வேயின் கரிபா ஏரியில் இடம்பெற்ற கோரப் படகு விபத்தில் உயிரிழந்தோரின் எண்ணிக்கை 72 ஆக உயர்ந்துள்ளதாக அந்நாட்டுப் பொலிஸார் உறுதிப்படுத்தியுள்ளனர். சனிக்கிழமை மேலும் 26 உடல்கள் மீட்கப்பட்டதைத் தொடர்ந்தே இந்த அதிர்ச்சித் தகவல் வெளியாகியுள்ளது. இதில் நெஞ்சை உலுக்கும் விடயம் என்னவென்றால், பலியானவர்களில் 18 பேர் பச்சிளம் குழந்தைகள் மற்றும் சிறுவர்கள் ஆவர்.
செவ்வாய்க்கிழமை கடுமையான கடல் போன்ற ராட்சத அலைகளில் சிக்கிய பழமையான படகு, ஏரியின் நடுவே கவிழ்ந்து மூழ்கியது. கரையோரப் பகுதிகளில் நிலவிய மோசமான சீரற்ற வானிலையே இந்த அனர்த்தத்திற்கு ஆரம்பக் காரணியாக அமைந்திருந்தது.
விபத்துக்கான பின்னணி குறித்து முன்னெடுக்கப்பட்ட விசாரணைகளில் பேரதிர்ச்சி தரும் தகவல்கள் வெளிவந்துள்ளன. 90 பேர் மட்டுமே பயணிக்கக்கூடிய அந்தப் பழைய படகில், அதன் கொள்ளளவையும் மீறி சுமார் 153 பேர் வரை ஏற்றப்பட்டிருந்ததாக மதிப்பிடப்பட்டுள்ளது. பயணச்சீட்டு தேவையில்லாத காரணத்தினால், படகில் பயணித்த குழந்தைகளின் எண்ணிக்கை ஆரம்பத்தில் கணக்கெடுக்கப்படாமல் விடப்பட்டிருந்தது. பின்னர் பொலிஸார் வெளியிட்ட பட்டியலில், உயிரிழந்தவர்களில் 16 பேர் 10 வயதுக்குட்பட்ட சிறுவர்கள் என்பதும், அதில் ஒரு வயதுக் குழந்தையும் அடங்குவதும் உறுதி செய்யப்பட்டுள்ளது.
சாலை உட்கட்டமைப்புகள் மிக மோசமாக சேதமடைந்து, பொதுப்போக்குவரத்து முற்றாக முடங்கியுள்ள வடமேற்கு கிராமப்புற மற்றும் மீனவ சமூகங்களைச் சென்றடைவதற்காக, கரிபா நகரத்திலிருந்து புறப்பட்ட போதே இந்த விபத்து நேர்ந்துள்ளது. போக்குவரத்துக்கான மாற்று வழிகள் இல்லாத காரணத்தால், மக்கள் தமது உயிரைப் பணயம் வைத்து இந்த ஆபத்தான படகுப் பயணத்தை நாட வேண்டிய கட்டாயத்திற்கு தள்ளப்பட்டுள்ளனர்.
மீட்புப் பணியாளர்களின் தீவிர முயற்சியால் 77 பேர் உயிருடன் காப்பாற்றப்பட்டுள்ள போதிலும், படகில் பயணித்த மொத்தப் பயணிகளின் எண்ணிக்கை மற்றும் மாயமானவர்களின் துல்லியமான விபரம் இதுவரை உத்தியோகபூர்வமாக உறுதிப்படுத்தப்படவில்லை. இதனால் பலி எண்ணிக்கை மேலும் அதிகரிக்கக்கூடும் என அஞ்சப்படுகிறது.
1950களின் பிற்பகுதியில் ஜாம்பேசி நதியை மறித்துக் கட்டப்பட்ட கரிபா ஏரி, பரப்பளவில் 200 கிலோமீட்டருக்கும் மேல் நீண்டு, சிம்பாப்வே மற்றும் சாம்பியா நாடுகளின் எல்லையைப் பிரிக்கும் உலகின் மிகப்பெரிய மனிதனால் உருவாக்கப்பட்ட செயற்கை ஏரியாகும். இந்த ஏரியின் ஆழத்தில் தொடர்ந்தும் மீட்புப் பணிகள் தீவிரமாக முன்னெடுக்கப்பட்டு வருகின்றன.
சர்வதேச டெஸ்ட் கிரிக்கெட் அரங்கில் எவரும் எதிர்பார்த்திராத மாபெரும் சரித்திரப் புரட்சியொன்று அவுஸ்திரேலிய மண்ணில் அரங்கேறியுள்ளது. டார்வினில் அமைந்துள்ள மறாரா மைதானத்தில் நடைபெற்ற முதலாவது டெஸ்ட் போட்டியில், பலம் வாய்ந்த அவுஸ்திரேலிய அணியை அதன் சொந்த மண்ணிலேயே 9 விக்கெட்டுகள் வித்தியாசத்தில் பங்களாதேஷ் அணி துவம்சம் செய்து புதிய வரலாறு படைத்துள்ளது.
நாணய சுழற்சியில் வென்று துடுப்பெடுத்தாடத் தீர்மானித்த அவுஸ்திரேலிய அணிக்கு ஆரம்பத்திலேயே பங்களாதேஷின் வேகப்பந்து வீச்சு பெரும் சோதனையாக அமைந்தது. ஹசன் மஹ்முத்தின் அனல் பறக்கும் பந்துவீச்சுக்கு ஈடுகொடுக்க முடியாமல் திணறிய அவுஸ்திரேலிய துடுப்பாட்ட வரிசை, முதல் இன்னிங்ஸில் வெறும் 198 ஓட்டங்களுக்குத் தப்பியோடிச் சுருண்டது.
இதனைத் தொடர்ந்து பதிலுக்குத் களமிறங்கிய பங்களாதேஷ் அணி, அவுஸ்திரேலிய பந்துவீச்சை நாலாபுறமும் சிதறடித்தது. தொடக்க ஆட்டக்காரர் தன்சித் ஹசன் அபாரமாகத் துடுப்பெடுத்தாடி சதம் (101 ஓட்டங்கள்) விளாச, பங்களாதேஷ் அணி தனது முதல் இன்னிங்ஸில் 426 ஓட்டங்களை குவித்து அவுஸ்திரேலியாவுக்கு 228 ஓட்டங்கள் என்ற இமாலயப் பின்னடைவைக் கொடுத்தது.
தனது இரண்டாவது இன்னிங்ஸை ஆரம்பித்த அவுஸ்திரேலிய அணிக்கு கேமரூன் கிரீன் போராடி சதம் (104 ஓட்டங்கள்) அடித்து நம்பிக்கையூட்டினார். எனினும், மெஹிதி ஹசன் மிராஸின் மாயாஜால சுழலில் 5 விக்கெட்டுகள் சரிய, அவுஸ்திரேலியா 284 ஓட்டங்களுக்குள் முடங்கியது. இந்தப் போராட்டத்தின் மத்தியில் அவுஸ்திரேலியாவின் முன்னணி வேகப்பந்து வீச்சாளர் ஜோஷ் ஹேசில்வுட் தனது 300ஆவது டெஸ்ட் விக்கெட்டை வீழ்த்தி தனிப்பட்ட சாதனையைப் பதிவு செய்தார்.
இறுதியில், பங்களாதேஷ் அணிக்கு 57 ஓட்டங்கள் மாத்திரமே வரலாற்று வெற்றிக்கான இலக்காக நிர்ணயிக்கப்பட்டது. அதனை நோக்கி ஆடிய பங்களாதேஷ் அணியில், மொமினுல் ஹக் (ஆட்டமிழக்காமல் 30) மற்றும் ஷாத்மன் இஸ்லாம் (ஆட்டமிழக்காமல் 25) ஆகியோர் நிதானமாக ஆடி 1 விக்கெட்டை மட்டுமே இழந்து வெற்றி இலக்கை எளிதில் அடைந்தனர். போட்டியின் இரு இன்னிங்ஸ்களிலும் சேர்த்து 9 விக்கெட்டுகளை வீழ்த்திய ஹசன் மஹ்முத் மற்றும் 5 விக்கெட்டுகளை வீழ்த்திய மெஹிதி ஹசன் மிராஸ் ஆகியோரின் மிரட்டலான பந்துவீச்சே பங்களாதேஷின் இந்த வரலாற்று வெற்றிக்குக் காரணமானது.
இந்தோனேசியாவின் கிழக்கு பிராந்தியத்தில் மக்கள் ஆழ்ந்த உறக்கத்திலிருந்த அதிகாலை வேளையில் ஏற்பட்ட கோர நிலநடுக்கம், ஒட்டுமொத்தப் பிராந்தியத்தையுமே நிலைகுலைய வைத்துள்ளது. நேற்று (15) அதிகாலை ஏற்பட்ட இந்த பாரிய அனர்த்தத்தில் குறைந்தது 51 பேர் பரிதாபமாக உயிரிழந்துள்ளதுடன், பெருமளவானோர் படுகாயமடைந்துள்ளதாக அந்நாட்டின் தேசிய பேரிடர் மேலாண்மை முகமை (BNPB) அதிகாரபூர்வமாக உறுதிப்படுத்தியுள்ளது.
ரிக்டர் அளவுகோலில் 7.7 என்ற அதியுயர் வீரியத்துடன் பதிவான இந்த நிலநடுக்கம், புளோரஸ் (Flores) தீவுப் பகுதியை மையமாகக் கொண்டு தாக்கியுள்ளது. பூமிக்கு அடியில் வெறும் 10 கிலோமீற்றர் என்ற மிகக் குறைந்த ஆழத்திலேயே இதன் மையம் அமைந்திருந்தமையால், அதிர்வின் தாக்கம் பூமிப்பரப்பில் வரலாறு காணாத பேரழிவை ஏற்படுத்தியது.
நில அதிர்வைத் தொடர்ந்து கடலோரப் பகுதிகளில் பெரும் பதற்றத்தை ஏற்படுத்தி சுனாமி எச்சரிக்கை விடுக்கப்பட்டது. பின்னர் அது மீளப்பெறப்பட்ட போதிலும், அச்சமூட்டும் வகையில் 1.5 மீற்றருக்கும் அதிகமான உயரத்திற்கு சிறிய சுனாமி அலைகள் கடலோரப் பகுதிகளைத் தாக்கியதாக அங்கிருந்து வரும் தகவல்கள் தெரிவிக்கின்றன.
இந்த இயற்கை அனர்த்தத்தின் கோரத்தாண்டவத்தால் 350-க்கும் அதிகமான வீடுகள் நொடிப்பொழுதில் இடிந்து தரைமட்டமாகியுள்ளன. அத்துடன் நின்றுவிடாது, 100-க்கும் மேற்பட்ட பாடசாலைகள், வைத்தியசாலைகள் மற்றும் அரச அலுவலகங்கள் உள்ளிட்ட பொதுக் கட்டடங்களும் பாரிய சேதங்களுக்கு உள்ளாகியுள்ளன.
நிலநடுக்கத்தை அடுத்து உருவான கடுமையான நிலச்சரிவுகள் பிரதான வீதிகளை முற்றாக மூடியுள்ளதுடன், மின்சார விநியோகமும் தொடர்பாடல் சேவைகளும் முழுமையாகத் துண்டிக்கப்பட்டுள்ளதால் பல கிராமங்கள் வெளியுலகத் தொடர்புகளை இழந்து தனிமைப்படுத்தப்பட்டுள்ளன.
தற்போது அனர்த்தம் நிகழ்ந்த பகுதிகளில் இராணுவம், பொலிஸார் மற்றும் பேரிடர் மீட்புக் குழுவினர் இணைந்து உயிர்காக்கும் தீவிர மீட்பு நடவடிக்கைகளில் களமிறங்கியுள்ளனர். ஆயினும், இடிபாடுகளுக்குள் இன்னும் பலர் சிக்கியிருப்பதாலும், போக்குவரத்து துண்டிக்கப்பட்ட தொலைதூர கிராமங்களை மீட்புக் குழுவினரால் உடனடியாக சென்றடைய முடியாத நிலை நிலவுவதாலும், உயிரிழப்பு எண்ணிக்கை மேலும் அதிகரிக்கக்கூடும் என்ற கடும் அச்சம் ஏற்பட்டுள்ளது.
சிலாபம் – இரணவில கடற்கரைப் பகுதியில் நேற்று அதிகாலை வேளையில் யாரும் எதிர்பாராத விதமாக இந்தியப் படகொன்று அனாதையாகக் கரை ஒதுங்கியுள்ளது. நள்ளிரவு அமைதியை கலைக்கும் வகையில் ஆட்களற்ற நிலையில் ஒதுங்கிய இந்த மர்மப் படகை அவதானித்த பிரதேச மீனவர்கள் உடனடியாக செயற்பட்டு அதனை கடற்படையினரிடம் ஒப்படைத்துள்ளனர்.
ஆகஸ்ட் 15 ஆம் திகதி அதிகாலை 2.45 மணியளவிலேயே இந்த விசித்திரப் படகு மீனவர்களின் கண்களில் சிக்கியுள்ளது. சுமார் 20 அடி நீளம் கொண்டதும், வெளி இணைப்பு இயந்திரம் (Outboard Engine) பொருத்தக்கூடிய வகையிலானதுமான இந்தப் படகை ஆய்வு செய்தபோது அதிகாரிகளுக்குப் பெரும் அதிர்ச்சி காத்திருந்தது.
சாதாரணமாக மீன்பிடிப் படகுகளில் இருக்க வேண்டிய மீன்பிடி உபகரணங்கள், வலைகள், ஆடைகள் அல்லது மீனவர்கள் பயன்படுத்தும் எந்தவொரு அத்தியாவசியப் பொருட்களும் அந்தப் படகினுள் இருக்கவில்லை. இதனால் இந்தப் படகு சாதாரண மீன்பிடிக்காக கடலுக்குள் வரவில்லை என்பது ஆரம்பத்திலேயே உறுதியானது.
ஏதேனும் சட்டவிரோத கடத்தல் நடவடிக்கைகளுக்குப் பயன்படுத்தப்பட்ட பின்னர், தடயங்களை மறைப்பதற்காக நடுக்கடலில் திட்டமிட்டு கைவிடப்பட்டிருக்கலாமா என்ற கோணத்தில் பாதுகாப்புத் தரப்பினர் தீவிர சந்தேகங்களை எழுப்பியுள்ளனர். கடந்த காலங்களிலும் சிலாபம், இரணவில மற்றும் தொடுவாவ கடற்பரப்புகளில் இவ்வாறான இந்தியப் படகுகள் கரை ஒதுங்கிய சம்பவங்கள் பதிவாகியுள்ளமை குறிப்பிடத்தக்கது.
தற்போது கடற்படையினரால் பொறுப்பேற்கப்பட்டுள்ள இந்த இந்தியப் படகு, அடுத்தகட்ட சட்ட மற்றும் பாதுகாப்பு விசாரணைகளுக்காக மஹவெவ உதவி கடற்றொழில் பணிப்பாளர் அலுவலகத்திடம் ஒப்படைக்கப்படவுள்ளது.
சர்வதேச வலைக்குள் சிக்கும் 73 பாதாள உலகக் கோஷ்டியினர்: IGP பிரியந்த வீரசூரியவின் அதிரடி அறிவிப்பு!
வெளிநாடுகளில் தலைமறைவாக உள்ள இலங்கையின் முக்கிய பாதாள உலகக் குழுவினர் மற்றும் போதைப்பொருள் கடத்தல்காரர்களைக் கூண்டோடு நாட்டிற்கு கொண்டுவருவதற்கான நடவடிக்கைகள் தீவிரப்படுத்தப்பட்டுள்ளன.
சர்வதேச பொலிஸாரினால் (இன்டர்போல்) சிவப்பு பிடியாணை பிறப்பிக்கப்பட்டுள்ள 73 முக்கிய குற்றவாளிகளை மிக விரைவில் இலங்கைக்குக் கொண்டுவந்து சட்டத்தின் முன் நிறுத்த நடவடிக்கை எடுக்கப்படும் எனப் பொலிஸ் மா அதிபர் (IGP) பிரியந்த வீரசூரிய அதிரடியாக அறிவித்துள்ளார்.
கண்டியில் ஊடகங்களுக்குக் கருத்துத் தெரிவித்தபோதே அவர் இந்த முக்கிய தகவலைப் பகிர்ந்துகொண்டார். அத்துடன், வெளிநாடுகளில் தலைமறைவாக உள்ள மேலும் பல முக்கிய நபர்கள் தொடர்பில் தீவிர விசாரணைகள் முன்னெடுக்கப்பட்டு வருவதாகவும் அவர் சுட்டிக்காட்டினார்.
தற்போது நாட்டில் முன்னெடுக்கப்பட்டு வரும் விரிவான போதைப்பொருள் மற்றும் பாதாள உலகக் குற்ற ஒழிப்பு நடவடிக்கைகளின் வெளிப்படைத்தன்மை சர்வதேச அளவில் பெரும் வரவேற்பைப் பெற்றுள்ளது.
வெளிநாட்டுத் தூதரகங்கள் மற்றும் சர்வதேச நாடுகளின் நேரடிப் பாராட்டும், உயர்மட்ட ஒத்துழைப்பும் இந்த நடவடிக்கைகளுக்குக் கிடைத்து வருவதாகப் பொலிஸ் மா அதிபர் பெருமிதத்துடன் குறிப்பிட்டார்.
இவ்வாறான குற்ற ஒழிப்புச் சோதனைகளை நிறுத்துமாறு தமக்கு எவ்வித வெளி அழுத்தங்களோ அல்லது அச்சுறுத்தல்களோ விடுக்கப்படவில்லை என்று குறிப்பிட்ட அவர், இச்செயற்பாடுகளைத் தடையின்றித் தொடர்ந்து முன்னெடுக்குமாறு மட்டுமே சர்வதேச மற்றும் உள்ளூர் மட்டங்களிலிருந்து கோரிக்கைகள் முன்வைக்கப்பட்டு வருவதாகவும் தெரிவித்தார்.
எனினும், இவ்வாறான கடத்தல்களுக்குப் பின்னால் நின்று முதலீடு செய்தவர்களுக்கும், உதவி புரிந்தவர்களுக்கும் இப்போது கடுமையான நடுக்கமும் கலக்கமும் ஏற்பட்டுள்ளது கண்கூடாகத் தெரிகிறது என்றார்.
அரசியல்வாதிகள் சிலர் தம்மைக் குறிவைத்து வெளியிடும் விமர்சனங்கள் மற்றும் கருத்துக்களுக்குத் தாம் ஒருபோதும் அஞ்சப்போவதில்லை எனவும், எந்தவொரு சவாலையும் நேருக்கு நேர் எதிர்கொள்ளத் தாம் தயாராக இருப்பதாகவும் அவர் திட்டவட்டமாகத் தெரிவித்தார்.
“நான் எந்தவொரு சமூக அநீதியையோ அல்லது நாட்டுக்கு அழிவையோ செய்யவில்லை; எனவே எந்தவொரு சிறப்புப் பாதுகாப்பும் இன்றியே நாட்டின் ஒரு முனையிலிருந்து மறுமுனைக்கு என்னால் சுதந்திரமாகச் செல்ல முடியும்” எனத் தெரிவித்த பொலிஸ் மா அதிபர், மக்களுக்கு முகத்தைக் காட்ட முடியாத நிலை தமக்கு ஏற்படவில்லை எனவும், சமூகத்திற்குப் பொய்யுரைத்து நாட்டைச் சீரழித்த சில அரசியல்வாதிகளுக்கே அத்தகைய நிலை உருவாகியுள்ளதாகவும் தனது காட்டமான நிலைப்பாட்டைப் பதிவு செய்தார்.
