• கற்பிட்டி இராணுவப் பயிற்சித் தளத்தில் விமானப்படையினருக்கும் பொலிஸ் அதிகாரி உள்ளிட்ட குழுவினருக்கும் இடையில் திடீர் மோதல் நிலை.
• அதிஉயர் பாதுகாப்பு வலயத்திற்குள் அத்துமீறி நுழைந்த மூவரால் வெடிகுண்டு செயலிழக்கச் செய்யும் பயிற்சியில் கடும் இடையூறு.
• விசாரணையில் பிடிபட்ட பொலிஸ் அதிகாரியும் இரு பொதுமக்களும் – தடித்த வார்த்தைகளால் முற்றிய வாக்குவாதம்.
• சம்பவம் குறித்து முழுமையான விசாரணை நடத்தி அறிக்கை சமர்ப்பிக்க விமானப்படை தளபதியால் விசேட விசாரணைச் சபை நியமனம்.

டெய்லி மிரர்: கற்பிட்டியிலுள்ள விமானப்படைக்கு சொந்தமான துப்பாக்கிச் சூட்டுப் பயிற்சித் தளத்தில் கடந்த 17ஆம் திகதி வழமையான இராணுவப் பயிற்சி ஒன்று போய்க்கொண்டிருந்தது. சும்மா சாதாரண பயிற்சி அல்ல, எந்நேரமும் வெடிக்கக்கூடிய ஆபத்தான வெடிகுண்டுகளை செயலிழக்கச் செய்யும் (Bomb Disposal Exercise) அதிமுக்கியமானதொரு ஒத்திகை அது. இதனால் அந்தப் பகுதி முழுவதும் பொதுமக்களுக்கு தடைசெய்யப்பட்ட, அதிஉயர் பாதுகாப்பு வலயப் பிரதேசமாக பிரகடனப்படுத்தப்பட்டிருந்தது.

விமானப்படை வீரர்கள் தங்களது கடமைகளில் தீவிரமாக இருந்த அந்த வேளையில்தான், யாரும் எதிர்பாராத விதமாக ஒரு ட்விஸ்ட் அரங்கேறியது. முறையான எவ்வித அனுமதியோ அல்லது முன்னறிவித்தலோ இன்றி, பாதுகாப்பு வேலிகளைத் தாண்டி மூன்று நபர்கள் திடீரென அந்த ஆபத்தான பகுதிக்குள் நுழைந்தனர். குண்டுகள் வெடிக்கும் பகுதியில் மனித நடமாட்டம் இருப்பதை அவதானித்த பாதுகாப்புப் படையினர் உடனடியாக சுதாரித்துக்கொண்டனர்.

அங்கிருந்த விமானப்படை வீரர்களும், பொலிஸ் விசேட அதிரடிப்படையைச் (STF) சேர்ந்த அதிகாரியொருவரும் இணைந்து, அத்துமீறி நுழைந்த அந்த மூவரையும் இடைமறித்து தீவிர விசாரணைக்கு உட்படுத்தினர். இதன்போதுதான் அந்த அதிர்ச்சி உண்மை வெளிவந்தது. பிடிபட்ட மூவரில் ஒருவர் சாதாரண சிவிலியன் உடையில் இருந்த பொலிஸ் அதிகாரி என்பதும், மற்றைய இருவருமே அவருடன் வந்த பொதுமக்கள் என்பதும் தெரியவந்தது.

ஏன் இந்த பகுதிக்குள் வந்தீர்கள் என அதிகாரிகள் கேள்வி எழுப்பியபோது, அங்கு நிலைமை கைமீறிப்போனது. இரு தரப்பினருக்கும் இடையே கடுமையான வாக்குவாதம் ஏற்பட்டு, வார்த்தைப் போர் முற்றியது. ஆபத்தான வலயத்தில் மக்களின் உயிரைப் பாதுகாக்கவே தாங்கள் விதிகளைப் பின்பற்றி கடமையாற்றியதாக விமானப்படை அதிகாரிகள் தரப்பில் தெரிவிக்கப்படுகிறது.

இலங்கை பாதுகாப்புத் துறையில் பெரும் பரபரப்பை ஏற்படுத்தியுள்ள இந்த மோதல் சம்பவம் குறித்து, தற்போது இலங்கை விமானப்படைத் தளபதி நேரடி கவனஞ்செலுத்தியுள்ளார். சம்பவம் தொடர்பில் பக்கச்சார்பற்ற மற்றும் விரிவான விசாரணைகளை மேற்கொண்டு, அவசர அறிக்கை சமர்ப்பிக்குமாறு விசேட விசாரணைச் சபை (Board of Inquiry) ஒன்றையும் அவர் அவசரமாக நியமித்துள்ளார். பாதுகாப்பு வலயத்தில் நடந்த இந்த அத்துமீறலின் பின்னணியில் உள்ள உண்மை என்ன என்பது இந்த அதிகாரப்பூர்வ அறிக்கை வெளியான பின்னரே முழுமையாகத் தெரியவரும்.

வலிகாமம் வடக்கு பிரதேச அபிவிருத்தி குழுக்கூட்டத்தின் போது, பாராளுமன்ற உறுப்பினர்களான இராமநாதன் அர்ச்சுனா மற்றும் கஜேந்திரகுமார் பொன்னம்பலம் ஆகியோருக்கு இடையே கடும் வாக்குவாதம் இடம்பெற்றமையினால் சபையில் அமைதியின்மை ஏற்பட்டது.  

குறித்த பிரதேச சபையின் அபிவிருத்திக்குழுக் கூட்டம் அதன் தலைவர் ஶ்ரீபவாநந்தராஜா தலைமையில் நேற்று (18) கூடியது.  

இதன்போது தெல்லிப்பழை ஆதார வைத்தியசாலை மற்றும் அதன் புற்றுநோய் சிகிச்சை பிரிவை மத்திய அரசாங்கத்தின் கீழ் கொண்டு வருவதற்கான யோசனை ஒன்று முன்வைக்கப்பட்டது.  

இந்த யோசனைக்கு பாராளுமன்ற உறுப்பினர் கஜேந்திரகுமார் பொன்னம்பலம் தமது எதிர்ப்பை தெரிவித்தார்.  

அது தொடர்ந்தும் மாகாண சபை நிர்வாகத்தின் கீழேயே இயங்க வேண்டும் என தெரிவித்ததுடன், குறித்த வைத்தியசாலையின் அபிவிருத்திக்கு அரசாங்கத்தினால் முறையாக நிதி ஒதுக்கப்படுவதில்லை எனவும் அவர் குற்றஞ்சாட்டினார்.  

எவ்வாறாயினும் வைத்தியசாலையின் அபிவிருத்தியை கருத்திற் கொண்டு அந்த வைத்தியசாலை மத்திய அரசாங்கத்தின் கீழ் கொண்டுவரப்பட வேண்டும் என அர்ச்சுனா வலியுறுத்தினார்.  

இதன்போது பாராளுமன்ற உறுப்பினர்களான இராமநாதன் அர்ச்சுனாவுக்கும், கஜேந்திரகுமார் பொன்னம்பலம் ஆகியோருக்கும் இடையில் கடும் வாக்குவாதம் ஏற்பட்டது.  

இதனால் அபிவிருத்திக் குழு கூட்டத்தின் போது அமைதியின்மை ஏற்பட்டது.  

இந்நிலையில் இன்றைய தினம் நடைபெறவுள்ள மாவட்ட அபிவிருத்திக் குழுக் கூட்டத்தில், குறித்த வைத்தியசாலையை மத்திய அரசாங்கத்தின் கீழ் கொண்டு வருவதற்கான யோசனையை முன்வைக்க அபிவிருத்திக் குழு தலைவர் நேற்றைய தினம் தீர்மானித்தார்.  

ஏதேனும் ஆட்சேபனைகள் இருப்பின் அங்கு தெரிவிக்க முடியும் எனவும் அவர் குறிப்பிட்டார்.

முஸ்லிம் ஊடகங்கள் தொடர்பான பாராளுமன்ற உரைக்கு அதிருப்தி!

பிரதியமைச்சர் முனீர் முளப்பருக்கு ஶ்ரீ லங்கா முஸ்லிம் மீடியா போரம் கடிதம்!

முஸ்லிம் ஊடகங்களைப் பிரதிநிதித்துவம் செய்வோர் இனவாத சக்திகளுக்குத் துணை போவதாக சமய விவகார மற்றும் கலாசார அலுவல்கள் பிரதியமைச்சர் முனீர் முளப்பர் அண்மையில் பாராளுமன்றத்தில் முன்வைத்த குற்றச்சாட்டு தொடர்பில் ஸ்ரீ லங்கா முஸ்லிம் மீடியா போரம் தனது அதிருப்தியை வெளியிட்டுள்ளது.

இது தொடர்பில் ஸ்ரீ லங்கா முஸ்லிம் மீடியா போரம் பிரதியமைச்சருக்கு 18.06.2026 திகதியிட்டு அனுப்பியுள்ள கடிதத்தில் மேலும் குறிப்பிடப்பட்டுள்ளதாவது,

கடந்த 11.06.2026 அன்று பாராளுமன்றத்தில் தாங்கள் உரை நிகழ்த்திய போது, “முஸ்லிம் சமூக விவகாரங்களை அறிக்கையிடும் முஸ்லிம் ஊடகங்கள், தமது செய்தி அறிக்கையிடல்கள் மூலம் இனவாத சக்திகளுக்குத் துணைபோகும் வகையில் நடந்து கொள்கின்றன” எனக் குற்றம்சாட்டியிருந்தீர்கள்.

இந்த ஆதாரமற்ற பாரதூரமான குற்றச்சாட்டு தொடர்பில் எமது பலத்த அதிருப்தியையும் கவலையையும் தங்களுக்குத் தெரியப்படுத்தும் பொருட்டே இக்கடிதத்தை அனுப்புகிறோம்.

முஸ்லிம் சமூகத்தை மையப்படுத்தி இயங்குகின்ற ஏதேனும் ஊடகங்களோ அல்லது ஊடகவியலாளர்களோ அவ்வாறான பக்கச்சார்பான பின்னணிகளைக் கொண்டிருப்பின் அல்லது தமது செய்தி அறிக்கையிடல்களில் உண்மைக்குப் புறம்பான விடயங்களை உள்ளடக்கியிருப்பின், அவற்றை ஆதாரபூர்வமாக, உரிய தரப்பினரின் பெயரை குறிப்பிட்டுச் சுட்டிக்காட்டுவதே முறையானதும் பொருத்தமானதுமாகும்.

அதனை விடுத்து, முஸ்லிம் சமூக மற்றும் சமய விவகாரங்கள் தொடர்பில் ஊடக நெறிமுறைகளைப் பேணி, நடுநிலையாக அறிக்கையிட்டு வரும் ஒட்டுமொத்த ஊடகங்களையும் உள்ளடக்கும் வகையில் தாங்கள் முன்வைத்துள்ள இக்குற்றச்சாட்டு எவ்வகையிலும் ஏற்றுக்கொள்ளப்பட முடியாததொன்றாகும்.

அண்மைக்காலங்களில் இலங்கை முஸ்லிம்கள் எதிர்கொண்ட பல்வேறு முக்கியத்துவம் வாய்ந்த விவகாரங்கள் குறித்து முஸ்லிம் ஊடகங்களும் ஊடகவியலாளர்களும் சமூகப் பொறுப்புணர்வுடன் மக்களை விழிப்பூட்டும் வகையில் செய்திகளை வெளியிட்டிருந்தனர். இது ஜனநாயகத்தின் நான்காவது தூணாக விளங்கும் ஊடகங்களின் இன்றியமையாத கடமையுமாகும்.

இவ்வாறானதொரு பின்னணியில், எவ்வித சான்றுகளுமின்றி பொதுப்படையாகத் தாங்கள் முன்வைத்த குற்றச்சாட்டு, அர்ப்பணிப்புடன் பணியாற்றும் முஸ்லிம் ஊடகவியலாளர்கள் மத்தியில் பெரும் மனவேதனையையும் ஏமாற்றத்தையும் ஏற்படுத்தியுள்ளது.

இவ்விடயம் அமைப்பின் அங்கத்தவர்களால் எமது கவனத்திற்குக் கொண்டுவரப்பட்டதை அடுத்து, கடந்த 15.06.2026 அன்று நடைபெற்ற எமது செயற்குழுக் கூட்டத்தில் இது குறித்து விரிவாக ஆராயப்பட்டு எடுக்கப்பட்ட தீர்மானத்தின் அடிப்படையிலேயே இக்கடிதம் தங்களுக்கு அனுப்பி வைக்கப்படுகிறது.

எனவே, எதிர்காலத்தில் இவ்வாறான பாரதூரமான மற்றும் பொதுப்படையான குற்றச்சாட்டுக்களை பாராளுமன்றம் உள்ளிட்ட உயரிய சபைகளில் முன்வைப்பதைத் தவிர்த்துக் கொள்ளுமாறும், தாங்கள் சபையில் முன்வைத்த மேற்படி கருத்தை திருத்திக் கொள்வதுடன், ஜனநாயகத்தின் தூண்களாக விளங்கும் ஊடகங்களின் சுயாதீன செயற்பாடுகளுக்கு மதிப்பளித்து, ஊடகவியலாளர்களின் கருத்துச் சுதந்திரத்தை உறுதிப்படுத்துமாறும் மிகவும் பணிவுடன் வேண்டிக் கொள்கிறோம் என்றும் அக் கடிதத்தில் மேலும் குறிப்பிடப்பட்டுள்ளது.

(எம் என் முஹம்மது)

அக்கரைப்பற்று மாநகர சபையில் சில எதிர்க்கட்சி உறுப்பினர்கள் கடைப்பிடித்து வரும் அரசியல் அணுகுமுறைகள் குறித்து மாநகர சபை உறுப்பினர் ஏ.சி.எம். நுஃமான் விமர்சனங்களை முன்வைத்துள்ளார்.

இது தொடர்பாக அவர் கூறுகையில்; சபைக்குள் ஆளுங்கட்சியுடன் இணக்கமாக செயல்பட்டு, தீர்மானங்களுக்கு ஆதரவு வழங்கும் சில உறுப்பினர்கள், சபைக்கு வெளியே எதிர்ப்பு அரசியலை முன்னெடுத்து வருவதாக குற்றஞ்சாட்டியுள்ளார்.

மேலும், சபையில் ஒரு நிலைப்பாடு, பொதுமக்கள் மத்தியில் மற்றொரு நிலைப்பாடு, சமூக வலைத்தளங்களில் வேறொரு நிலைப்பாடு என செயற்படுவது கொள்கை அரசியல் அல்ல என்றும், அது சந்தர்ப்பவாத அரசியலின் வெளிப்பாடாகும் என்றும் அவர் கடுமையாக விமர்சித்துள்ளார்.

மக்கள் பிரதிநிதித்துவம் என்பது அறிக்கைகள் அல்லது புகைப்பட அரசியலால் அளவிடப்படுவதில்லை என்றும், மக்களுக்காக எடுக்கப்படும் பொறுப்புணர்வான மற்றும் துணிச்சலான முடிவுகளின் அடிப்படையிலேயே மதிப்பிடப்பட வேண்டும் என்றும் அவர் குறிப்பிட்டுள்ளார்.

தேசிய காங்கிரஸின் மாநகர உறுப்பினர்களாகிய தாங்கள், மக்களுக்கு வழங்கிய வாக்குறுதிகளை நிறைவேற்றும் நோக்கில் தொடர்ந்தும் செயல்பட்டு வருவதாகவும், அக்கரைப்பற்று மாநகர மேயரும் தேசிய காங்கிரஸின் தலைவருமான கௌரவ ஏ.எல்.எம். அதாவுல்லாஹ்வின் வழிகாட்டுதலின் கீழ் அபிவிருத்தி பணிகளை முன்னெடுத்து வருவதாகவும் அவர் தெரிவித்துள்ளார்.

அதேவேளை, மக்களை குழப்பி அரசியல் ஆதாயம் தேடும் இரட்டை நிலைப்பாட்டு அரசியலை மக்களிடம் வெளிப்படுத்துவோம் என்றும் அவர் வலியுறுத்தியுள்ளார்.

அக்கரைப்பற்று மக்கள் அரசியல் விழிப்புணர்வு மிக்கவர்கள் என்பதுடன், உண்மையாக மக்களுக்காக செயற்படுபவர்களையும், தேர்தல் காலங்களில் மட்டும் குரல் கொடுப்பவர்களையும் வேறுபடுத்தி அறிந்திருப்பார்கள் எனவும் தெரிவித்தமை குறிப்பிடத்தக்கது.

• கற்பிட்டி – கந்தகுளிய, வெடிபிட்டி வான்படை பயிற்சி வலயத்தில் மறைத்து வைக்கப்பட்டிருந்த ரூபா பல இலட்சம் பெறுமதியான கடத்தல் பொருட்கள் பொலிஸாரால் கைப்பற்றப்பட்டுள்ளன.
• சோதனை நடவடிக்கையின் போது அங்கு வந்த விமானப்படை அதிகாரிகள் மற்றும் சிப்பாய்கள் சிலர் பொலிஸாரின் கடமைகளுக்கு பலத்த இடையூறு விளைவித்துள்ளனர்.
• கற்பிட்டி பொலிஸ் அதிகாரிகள் அண்மையில் ஒட்டுமொத்தமாக இடமாற்றம் செய்யப்பட்டதைத் தொடர்ந்து, புத்தளம் ஊழல் ஒழிப்பு பிரிவினரால் இந்த அதிரடி சுற்றிவளைப்பு நடத்தப்பட்டுள்ளது.

வான்படை பயிற்சி எல்லையில் துணிகரம்: பொலிஸாருக்கு விழுந்த ‘முட்டுக்கட்டை’! பின்னணி என்ன?

கற்பிட்டி கடல் பிராந்தியம் எப்போதும் கடத்தல்காரர்களின் சொர்க்கபுரி என்ற அவப்பெயரை சுமந்து நிற்கிறது. அதனை மெய்ப்பிக்கும் வகையில், இம்முறை யாரும் ஊடுருவ அஞ்சும் இலங்கை விமானப்படைக்கு சொந்தமான, குண்டுகள் வீசி பயிற்சி பெறும் ‘வெடிபிட்டி’ வலயத்திலேயே கடத்தல் பொருட்கள் பதுக்கி வைக்கப்பட்டிருந்த அதிர்ச்சிச் சம்பவம் வெளிச்சத்திற்கு வந்துள்ளது. புத்தளம் கோட்ட ஊழல் ஒழிப்பு பிரிவினர் கடந்த 17ஆம் திகதி முன்னெடுத்த மின்னல் வேக சோதனையிலேயே இந்த பெரும் கடத்தல் முறியடிக்கப்பட்டுள்ளது.

விமானப்படை அதிகாரிகள் வான்வழியாகவும் நிலவழியாகவும் துப்பாக்கிச் சூடு மற்றும் குண்டுவீச்சு பயிற்சிகளை மேற்கொள்ளும் ஆபத்தான வலயத்திலேயே இந்த பொருட்கள் மிகச் சூட்சுமமாக மறைக்கப்பட்டிருந்தன. அங்கிருந்து சட்டவிரோதமாக கடல்வழியாக கொண்டுவரப்பட்ட 420 கிலோவும் 50 கிராம் எடையும் கொண்ட மஞ்சள், 1600 சோப்புக் கட்டிகள் மற்றும் 45,888 ஷாம்பூ பக்கெட்டுகளை பொலிஸார் அதிரடியாக மீட்டனர்.

ஆனால், இங்குதான் கதையின் அசல் திருப்பமே அரங்கேறியது!

பொலிஸார் கடத்தல் பொருட்களை கைப்பற்றிக் கொண்டிருந்த வேளையில், சம்பவ இடத்திற்கு வந்த விமானப்படை அதிகாரி ஒருவரும் அவரது குழுவினரும் பொலிஸாரின் சட்டபூர்வ கடமைகளுக்கு கடும் இடையூறு விளைவித்துள்ளனர். எனினும், அதற்கு அடிபணியாத பொலிஸ் அதிகாரிகள், வான்படையினரின் எதிர்ப்பையும் மீறி கடத்தல் பொருட்களை வெற்றிகரமாக பறிமுதல் செய்து மேலதிக விசாரணைக்காக கற்பிட்டி பொலிஸாரிடம் ஒப்படைத்துள்ளனர். இந்த பரபரப்பான சூழலுக்கு மத்தியில் கடத்தல்காரர்கள் தப்பியோடியுள்ளனர்.

அரசியல் சர்ச்சை… ஒட்டுமொத்த இடமாற்றம்… இப்போது கடத்தல் வேட்டை!

கற்பிட்டி பொலிஸாருக்கு கடத்தல்காரர்களுடன் தொடர்பு இருப்பதாக கடந்த காலங்களில் கடுமையான குற்றச்சாட்டுகள் எழுந்திருந்தன. அண்மையில் சிலாபத்திற்கு விஜயம் செய்திருந்த பொதுமக்கள் பாதுகாப்பு அமைச்சர் மற்றும் பொலிஸ் மா அதிபர் முன்னிலையில், உள்ளூர் அரசியல்வாதி ஒருவர் இந்த முறைகேடுகளை பகிரங்கமாக தோலுரித்துக் காட்டினார்.

இதன் உடனடி எதிரொலியாக, கற்பிட்டி பொலிஸ் நிலையப் பொறுப்பதிகாரியை (OIC) தவிர ஏனைய அனைத்து பொலிஸ் அதிகாரிகளையும் உடனடியாக இடமாற்ற பொலிஸ் மா அதிபர் உத்தரவிட்டிருந்தார். அதன்படி, கடந்த ஜூன் 08ஆம் திகதி 24 அதிகாரிகளும், ஜூன் 10ஆம் திகதி மேலும் 15 அதிகாரிகளும் அதிரடியாக தூக்கியடிக்கப்பட்டனர்.

இவ்வாறானதொரு பின்னணியில், புதிய அதிகாரிகளின் கண்காணிப்பில் இந்த சோதனை நடந்துள்ளது. கடலில் சட்டவிரோத கடத்தல்களை முறியடிக்கும் போது, ஏனைய பாதுகாப்புப் பிரிவினர் தங்களுக்கு முட்டுக்கட்டையாகவும், கடத்தல்காரர்களுக்கு சாதகமாகவும் செயற்படுவதாக பொலிஸ் அதிகாரிகள் தரப்பிலிருந்தே இப்போது பகிரங்க குற்றச்சாட்டுகள் கிளம்பியுள்ளமை பாதுகாப்பு தரப்பில் பெரும் சலசலப்பை ஏற்படுத்தியுள்ளது.

செய்தி தொகுப்பு: ஜூட் சமந்த